Shillong, Naiwieng 26
U Myntri Rangbah ka Jylla Conrad K Sangma ha ka sngi Balang u la pynbna ïa ka jingjop ba khraw ha ka kam sam bording ha Jylla, naba ka Sorkar Pdeng kala mynjur ïa ka song pisa ba T.500 klur ha ka ban pynpoi bording ilektrik sha ki shnong bad ki longïing ba dang shong dum hapoh ka Revamped Distribution Sector Scheme (RDSS).
“Nga la leit ïakren ïa ka Sorkar India ha u 2022 ba kito ki shnong bad ki longïing, kila shah ieh bad kim shym la shah kynthup ha ka khana samari ha katei ka por bad nga sngewtynnad ban pyntip sha phi ba ka Sorkar India kala mynjur bad ai ïa ka mang tyngka ba jan kot T.500 klur ban pynpoi bording noh sha ki,” ong u Conrad haba ïakren bad ki lad pathai khubor hadien ka jingïalang ka Kynhun Myntri.
Katkum ka jingong jong u, kane kan pyndap ïa ki jingduna kiba mih na ka khana samari u snem 2011, ka ban kdup ïa ki longïing ba dang thymmai ki bym shym la kynthup ha ka jinglum khana samari ha ki snem ba la leit.
“Ha ki snem ba la leit, ki don ki skhim bapher-bapher ka Sorkar ïa kaba ki longïing bapher-bapher bad ki shnong bapher-bapher kila ïoh bording hynrei ïa baroh kine ki jingpynpoi bording la pynshong nongrim na ka thup ba la lum bad ka khana samari, kaba la slem bha, kaba dei jong u snem 2011. Katkum kane ka samari, kiba bun ki shnong kila ïoh bording hynrei ki shnong thymmai bad ki ïing thymmai ba mih hadien kila shah ieh,” u la ong.
