Shillong, Naiwieng 26
Ka Meghalaya Commer-cial Truck Owners and Drivers Association (MCTODA) ka la shim ïa ka rai ba lada ka Sorkar bad ki kompeni pynmih dewbilat kim pdiang ïa ki mat ban rah lashai ka sngi ka 27 tarik Naiwieng 2025 ha Secretariat, kin pynlong biang da ka jingïakhih ha surok.
Kane ka jingrai ka dei hadien ba la ïatai sani baroh shisngi kaba la long ha ka sngi Balang ha madan Mawryng-kneng, East Khasi Hills District.
Ki mat kiba ka MCTODA kan rah lashai ka sngi ka 27 tarik Nai-wieng, 2025 ha ka por 3:00 baje janmiet ban ïakynduh ha Secretariat, ki don haduh hynñiew tylli ki mat.
U Chairman ka MCTODA Bah Moslander u la pan jingmynjur ïa baroh ki dkhot hadien ba la dep pynsngew ïa ki mat jingdawa.
Kine ki mat jingdawa ki long ban pynbna noh ïa ka bai kit 9 tyngka na ka bynta shi kilometre kaba la dep mynjur ha u bnai Kyllalyngkot, 2020.
Nangta ki la dawa ban nym treh ban ïa bhah hynrei dei ban ailut ïa ki kali trai Jylla ban kit dewbilat namar kam myntoi ban siew ha ka dor 9 tyngka ka bai kit katba kim ïoh mar ban kit.
U Bah Moslander u la ïathuh ba ki don palat ar hajar tylli ki trok shisngi ban kit dewbilat shabar ka Jylla dei na kane ka daw ba ki kwah ban ïoh lang ki trok napoh ka Jylla.
U la ïathuh biang ba lada kim ïoh kit mar, kin ap haduh lai sngi palat ïa kata ki kompeni ki hap siew hi ïa ka bai bam bad jinglut ïa ki trai trok bad nongñiah.
U Bah Moslander u ïathuh ban dawa ruh ba ki trai trok kim dei ban bahkhlieh lada ki don ki plastic dewbilat kiba la jot namar kine ki nongtrei kompeni ki leh khnang ban jot.
Shuh shuh u la ïathuh ba kine ki kompeni ki dei ban pyntip biang por ban kit ïa ki mar khnang ban suk ban wad kali, namar ki kompeni ki shu phone kyrkieh bad kan shem shitom ïa ki trai trok ban pynbiang kali ban leit kit mar.
U la ïathuh ba ka seng ka ïarap ruh ïa ki paradoh parasnam kiba ñiah kali kompani namar kim ïoh thikna ka jingsiew man u bnai bad ka jingsiew ruh kaba rit.
