Shillong, Naiwieng 26
Ka kynhun ïalehkai hoc-key ka India ka la pynliem noh ïa ka Malaysia da 4-3 kol ha ka lympung ïalehkai Sultan Azlan Shah Cup 2025 kaba la long ha ka sngi Balang ha Ipoh.
Ïa ki kol na ka bynta ka India kaba bat ïa ka kyrdan ba hynñiew ha ka pyrthei la thep da u Selvam Karthi (7), Sukhjeet Singh (21), Amit Rohidas (39) bad u Sanjay (53), katba u Faizal Saari (13), Fitri Saari (36) bad u Marhan Jalil (45) ki la lah ban pynphai na ka bynta ka Malaysia, kaba don ha ka kyrdan ba khadar.
Kane ka jingjop ïa ka Malaysia ka la pynlong ïa ka India ban jam sha ka kyrdan balai ha kane ka lympung da kaba kamai 6 poiñ na ki lai sien ïakhun. Ka India kham hashwa ka la pynliem ïa ka Republic of Korea ha ka jingïakhun nyngkong jong ka hashwa ba kan shah rem noh ha ka Belgium, kaba la bat teng ïa ka nam lahduh ha ka Olympic.
Ka India ka la sdang ïa ka jingïalehkai kaba itynnad ha madan Sultan Azlan Shah, ha kaba ka liang pyrshah ka la wanphai da ka jingkhlaiñ bor biang na ka bynta ban ïakhun tyngeh. Hynrei haduh kaba kut ka jingïalehkai ka Malaysia kaba long ka nongpdiang ïa kane ka lympung, ka la mad ïa ka jingshah rem.
Te kumta ka India kan ïakynduh pyrshah sa ïa ka New Zealand ha ka sngi Palei.
