Shillong, Naiwieng 26
U Myntri Rangbah ka Jylla u Conrad K Sangma u la pynthikna ba ka Meghalaya ka long kaba shngaiñ, da kaba weng noh ïa ki jingsngewkhia halor ka jingshngaiñ hadien ki jingjia kiba dang shen kiba ïadei bad ka jingtohkit halor ka jingbthei bom ha Delhi.
Haba kren sha ki lad pathai khubor ha ka sngi Balang, u Conrad u la ong ba ka jingtohkit ka long beit halor ka jingjia pynbthei bom ha Delhi bad kam don kano-kano ka daw ban sngewkhia ha kaba ïadei bad ka jingshngaiñ ha ka Jylla.
“Ngi la shim ïa ki lad ki lynti baroh ban pynthikna ïa ka jingshngaiñ, hynrei kam don kano-kano ka daw ban ngeit ba ka don kano-kano ka jingma kaba kyrpang ïa ka Jylla,” u la bynrap.
U Myntri Rangbah u la ban jur ba ka Sorkar bad ki tnad syntiat bad tnat pahara ki long kiba peitngor bad kin ïai bteng ban shim ïa baroh ki lad jingïada ban pynneh ïa ka shongsuk shongsaiñ hapoh ka Jylla.
