Shillong, Naiwieng 26
U Kishan Lyngdoh u la lah ban lamkhmat ïa ka kynhun ïalehkai ka Jylla da ka jingkamai ka jong u ïa ka spah ron (century) bad kane ka la biang pura ïa ka Meghalaya ba kan pynliem noh ïa ka Sikkim da 9 ron ha ka Syed Mushtaq Ali Trophy 2025-26 ha ka sngi Balang ha Pune.
Ka Sikkim hadien ba ka la jop ïa ka jingkynting pisa (toss), ka la ailad shwa ïa ka Meghalaya ba kan tied nyngkong, kaba hangne u Kishan u la lamkhmat ïa ka kynhun da kaba kamai 115 ron bad bynrap pat sa ka 63 ron lyngba u Arpit Bhatewara na ka bynta ban buh ïa ka thong kaba 190 ron hadien ba la shah pynhap 7 wiket ha ki 20 over.
Haba wan shimti ïa ka pali kaba ar, ka Sikkim ka la lah ba kan kamai 181 ron bad shah pynhap 4 wiket.
Ha kane ka jingïakhun, ka Meghalaya ka la ïaleh katba lah ban kynjoh sha ka thong kaba 200 ron, hynrei ka jingshah pynhap wiket ka la ktah ïa kane ka kynhun bad ka la duna 10 run ban poi sha katei ka thong.
Wat lada ka Sikkim ka la hap noh tang saw wiket, hynrei ka por ka jinghap pat jong ki ka long hapdeng ki khyllipmat kiba ka donkam bha bad katno tam lei lei ban seng ïa ka nongrim ha ka jingkamai ron paralok.
U A.B Rajera u la pyrshang ban lamkhmat ïa ka kynhun da kaba kamai 36 ron na ki 35 bol bad u K.Sai Satwik u la ïoh 23 ron na ki 23 bol bud pat sa u Kranthi Kumar uba la lah ban kamai 66 ron na ki 34 bol bad ïai neh haduh ba kut ka over bad ba u la ïoh ïa ka jingkyrshan ba radbah bha na u Robim Limboo uba la lah ban noh synñiang ha ka ban kamai 35 ron na ki 18 bol, hynrei u la ‘run out’ noh ha u Himan Phukan.
Ha kane ka jingïakhun, ka Meghalaya kam shym la pyndonkam ïa kino-kino ki rangïalehkai kiba na shabar ne ‘guest player’, hynrei ki bor pynïaid ka MCA ki la aiti bad shaniah skhem beit tang ha la ki jong ki rangïalehkai napoh ka Jylla.
Napdeng ki nongkawang bol ka Meghalaya, kiba la ïoh ban ïa khur wiket ki long u Himan (1/22), Swarajeet Das (1/25) bad Ram Gurung (1/31).
Ha kaba kut ka jingïakhun, u Kishan u la ïoh ban rah ïa ka nam Player of the Match, bad ka jingïakhun ka ban wan jong ka Meghalaya kan bteng biang ha sngi Thohdieng pyrshah ïa ka Manipur.
