Ki longkmie bad rangbah kiba ju ïaid ban tyrwa sha, soh bad kiwei kiwei ki jingdie ha ki bynta jong ka Khyndailad, ki la pynpaw ïa ka jingbitar bad jingbym sngew ïahap halor ka jingwan khang jong ki nongtrei ka Shillong Municipal Board bad khamtam lei hadien ba ki la kurup noh ïa ki ketli sha, ki shang jingbam bad kiwei kiwei. Hooid ka Khyndailad ka dei kawei na ki jaka kaba long pdeng bad kaba sakhi ïa ka jingbun ki briew kiba leit ba wan. Ka jingpyrshang jong ka Sorkar ha kaba nyngkong ban pynkynriah noh ïa ki nongdie madan, ka la long shisha ka kam kaba radbah, kaba la lah ban wanrah ïa ka jinglong kylluid jong katei ka jaka. Hynrei kaba sngew lyngngoh pat ka long, ba mynta la hiar biang ki nongtrei ka Shillong Municipal Board ban khang die jingdie pat sa ïa kito kiba shu ïaid tyrwa sharum shaneng, tang kumno ban lah ban pyndap ïa ka ïing ka sem bad pynbit pynbiang ïa la ki khun ki kti.
Hato, haduh katno kata ka jingdie kaba shu ïaid tyrwa ka pynwit ïa kita ki nongleit nongwan, kaba pynlong ïa ka Sorkar lyngba kata ka Municipal ban wan khang noh shi syndon ïa kum kine ki kam. Hato yn khang noh ïa ki nongleit thied jingthied ruh namar ma ki ruh, ynda la mih na ki dukan, haba ki la thied ïa ki tiar ki tar, ka mut ym long shuh ban ïaid namar ka jingrah ïa ki pla ne ki pla plastik ba heh ba heh kan pynwit. Ka long kaba sngew sammut ba kiei kita kiba ai jingmut ban khang ïa ki nongdie jingdie kiba shu die tyrwa da kaba ïaid sharum shaneng. Kine ki briew ym dei ba ki shu wan ban ïaid sngewbha ha ki thaiñ Khyndailad hynrei ki trei shitom kumno ban ïoh kamai jakpoh bad ruh ban pyndap ha la ki ïing ki sem ne ban ïoh ka bam bad lait na ka jingshah thngan.
Manla ki por ju sakhi ha kiba bun ki jingïalang, ba na ka liang jong ka Sorkar ka ju pynshlur ïa ki nongshong shnong khamtam ki samla ba kin ïaleh ban ïeng ha la ki jong ki kjat da kaba seng ïa ki kam ki jam. Hynrei haba kumne pat, shano kin leit, lada ki trei da kaba die jingdie khlem da kurup jaka ne pynwit ruh kin shah khang noh, te shaei kin leit. Halor kane ka jingleh jong ka Sorkar lyngba ka Shillong Municipal Board, la sakhi tang ïa ki jingpynrem na kiba bun ki liang, kiba la pynpaw ba kane ka jingleh ka Sorkar kam long satia kaba ïahap hynrei ka dei tang ka jingthombor bad ñion beiñ ïa ki briew ba duk ba raitoi. Balei haduh katne katne, kiba trei shitom bad minot imat kim don jaka shuh, la shu shah kyndang bad shah beh beit, katba ïa kiba die ïa ki jingdih buaid pat ym ïohi satia ba ka Sorkar kan lah ban pynkhuid ne rad pura.
Haba phai sha ki bynta kum ha ka thaiñ Khyndailad, Polo, Urkaliar, la ïohi ba ki jingsniew ki la kynrei bha khamtam ha ki por mynmiet, hynrei ym don satia kiba patiaw bad la ïohi ba ka jingïadie ïathied ka long pylleiñ pylleiñ. Shano ki bor jong ka aiñ, ban khang pyrshah ïa kine kiei kiei, kiba la pynwit shi katdei eh ïa ka leit ka wan jong ki briew. Hato don aiu sha lyndet jong ka jingpyrshang ban khang ïa ki briew kiba die jingdie da kaba tyrwa bad ïaid kylleng kylleng. Ka Sorkar ka dei ban pynshai namar ka jingleh jong ka, kam ïahap satia naba la shu leit ban khang beit syndet syndet.
