Shillong, Naiwieng 27
Ka Khasi Students’ Union (KSU) kala buh dak jingkylli ïa ka jingkynnoh bym leh eiei ka tnad aiñ pyrshah ïa u Vice Chancellor ka National Law University (NLU), Meghalaya, u Indrajit Dube wat hapdeng ki jingkynnoh bamsap bad jingpynïaid bakla ïa ki kam ka skulbah.
Ha ka shithi bala phah sha u Myntri ka tnad Aiñ Bah Lahkmen Rymbui ha ka sngi Palei, ka KSU kala kynnoh ba u Dube u la donkti ha kiba bun ki jingtreikam bym hok, kynthup ka jingjah rngai ka pisa ka University, ka jingthungkam beaiñ bad ka jingpynkheiñ ïa ka Meghalaya State Reser-vation Policy.
“Ngi la ai sha ki bor ba dei khmih ïa ki nongrim kiba khlaiñ halor ka jingbamsap bad jingpynïaid bakla
ïa ki kam da u VC ka NLU lyngba ki jingshem RTI, ba dei ban weng noh ïa ki bad la kular ïa ka seng ba kan thung ïa ka jingtohkit bad ïa ka kaiphod yn da pyndep hapoh ka ar bnai,” ong ka shithi ka KSU.
“Hynrei ka por kala ïaid la hynriew bnai haduh mynta bad ym shym la leh eiei satia halor kane ka kam bad u VC ka NLU u dang ïai bteng ha ki jingmlien jong u ban thungkam beaiñ bad ki kam bamsap,” kala ong haba bynrap “Ka Seng kala ap da ka jingïaishah ïa ka Sorkar ba kan shim ïa ki sienjam ba leh ïa kaba donkam hynrei ka jingbym leh eiei ka Sorkar ïa kum kane ka kam ba kongsan ka pyni ba ka Sorkar ka pynshlur ïa ki kam bamsap”.
Ka KSU kala kdew ruh ïa bun ki kam ba kynnoh bamsap kynthup ka jingpynlut ïa ka pisa ba T.15,10,347 na ki kam leit jingleit shimet, T.3,56,750 na ki jingïadih kyiad, bad jingsiew ba T.46,83,500 kum ka jingsiew tulop ïa ki professor ki bym shym la shim klas.
“Ki don da ki dorjon kiwei pat ki kam bym hok kiba ka seng kala kdew ha ki shithi barim ha kaba ka jingthungkam ruh la leh ym katkum ka Meghalaya State Reservation Policy bad u VC u kwah eh ban pynkylla ïa ka Reservation Policy khnang ban ailad ïa ka jingthungkam paralok ne bahaïing ba kin long ki nongtrei ba pura ka NLU,” ka la ong.
Ka KSU kala kdew ruh ba halor kane, ha ka jingthungkam ba dang shu dep shen ïa u Assistant Professor, u la buh ïa ki kyndon ba palat pud khnang ban nym don ki kyrtong trai ri trai muluk kiba lah ban aplai, ka ban nang aibor ïa ka jingïaleh jong u ban pynkylla ïa ka Reservation Policy na ka bynta ka jingbha jong ka University.
Ka KSU kala kyntu ïa ka Sorkar ba kan leh eiei pyrshah ïa u Dube hashuwa ba kan kut ka samoi shakri jong u ha u bnai Rymphang 2026 bad ban pynthikna ba ym dei ban ailad ïa ki kam bamsap.
“Ka Seng ka kwah ban ban jur ïa ka nongrim ba u Indrajit Dube um dei ban ïoh trei biang hadien ba kut noh ka samoi treikam jong u ha u Rymphang, 2026 bad katkum ka Act, u VC ba nyngkong u lah ban bat ïa ka ophis ym palat ïa ka 3 snem,” kala ong haba dawa ïa ka Sorkar ba kam dei ban shu sngap ïa ki kam bamsap hynrei ban leh eiei pyrshah ïa u VC ka NLU kaba la pynshong nongrim katkum ki jingshem RTI.
