Shillong, Naiwieng 27
Ka Real Madrid ka la lah ban pynliem noh ïa ka Olympiacos da 4-3 kol bad ki saw kol ba la thep da u Kylian Mbappe ki la biang pura ïa kane ka kynhun ïalehkai ba khlaiñ bor na Spain ban jam sha ka kyrdan basan ha ka UEFA Champions League.
Ki saw tylli ki kol jong u Mbappe ki la pynkut shi syndon ïa ki jingpyrshang jong u Chiquinho, Mehdi Taremi, bad u Ayoub El Khaabi, kiba la thep kol na ka ka bynta katei ka kynhun ïalehkai na Greece.
U Mbappe u la ïoh ruh ïa ka hat-trick kaba ar jong u ha ka jingstet ha kane ka lympung, ha kaba u la thep kol ha ka minit kaba 22, kawei pat hadien ar minit bad bad pyndep ïa ka hat-trick ha ka minit kaba 29. U la thep ïa ka kol kaba saw jong u ha ka shi kynta.
“Ka la long kaba kongsan ban ïoh biang ïa ka jingjop. Ngi tip ba ki lai tylli ki jingïalehkai khlem jingjop ki buh jingeh bha na ka bynta jong ngi,” la pynpaw u Mbappe.
“Ka kynhun ka long kaba biang bha ha nga, watla ka don beit ka jaka kaba hap ban pynbha. Ha ka klob kum ka Real Madrid, ka long kaba thikna bha ba ki briew ki ju ïakren ïakhana.”
“Nga sngewkmen shibun. Ka long kaba sngewtynnad ban thep kol. Ki paralok jong nga ki ïarap ïa nga ban pynbuh bol. Nga long uba donbok shibun ban ïalehkai ha kane ka kynhun, ryngkat bad kine ki paralok,” la bynrap biang une u khlur ïalehkai ka France uba la don bynta ban pynjop ha ka World Cup.
U coach ka Real Madrid, u Xabi Alonso, u la ban jur ïa ka jingdonkam ban ïoh biang ïa ka jingjop bad ban pynbeit ïa ka jingïalehkai jong ki katkum ka jinglong jingman.
“Ka jingdonkam mynta ka sngi ka long ban pynpra ïa ka jinglong ba ngi la don bad ban ïoh biang ïa kata ka jingsngew ban khur jingjop,” la byntap une u rangïalehkai barim.
“Ngi donkam ïa ka jingïatrei lang da baroh, katba u Kylian u la lah ban thep kol,” la pynkut u Alonso.
