Shillong, Naiwieng 27
Ka nongbah Shillong ka la long kaba donbok ha kaba kan ïoh ban pynlong ïa ka jingïalehkai group jong ka 79th National Football Championship na ka bynta ka Santosh Trophy 2025-26 ha u Nohprah mynta u snem.
Ha kane ka lympung, ka Meghalaya kaba la don ha ka Group-E ha kaba kan hap ban ïakhun pyrshah ïa ka Sikkim bad ka Arunachal Pradesh. Te kumta ka Meghalaya kan ïakhun nyngkong pyrshah ïa ka Sikkim ha ka 19 tarik u Nohprah bad ïa ka Arunachal Pradesh ha ka 23 tarik.
Kat kum ka jingpynpaw da u General Secre-tary ka Meghalaya Foot-ball Association (MFA) u Bah Sunesh Syiem u la ong ba ïa kane ka jingïalehkai lah ban pynlong ha SSA Stadium kaba ha First Ground, Polo.
“Kane ka long ka kabu ksiar ïa ka kynhun ïaleh -kai ka Jylla ba kan ïalehkai bha ha la ïing hakhmat ki paidbah nongkyrshan pyrshah ïa kitei ki kynhun kiba na ka thaiñ shatei lammihngi. Ka jingjied ïa ki rangïalehkai ki ban mihkhmat ïa ka Jylla kan shong kat kum ka jinglah ban pynpaw ïa ka jingtbit jong ki ha ki lympung ïalehkai mynta ka aïom,” u la bynrap.
Ha kaba ïadei bad ka jingjied ïa ki coach ki ban shimti ban ïalam ïa ka kynhun sha katei ka lympung, u Bah Sunesh u la ong ba ka MFA kan sa peit ïa kiba don kyrdan ki ban shimti kum ki coach. “Ngi dangduna bha ki coach kiba la bat kyrdan kum ki A-Licence, hynrei kum ka synjuk ngin sa shim ïa ka rai mano ba dei hok ban ïoh.”
Nalor ka Shillong, kiwei pat ki jylla ki ban pynlong ïa kine ki jingïalehkai group ki ban sdang naduh 15 haduh 26 tarik u Nohprah ki long ka Punjab, Uttar Pradesh, Delhi, Tripura, Chhattis-garh, Andhra Pradesh, Kar -nataka bad ha Rajasthan. Kin don haduh 30 tylli ki kynhun ïa kiba la phiah ha la ki jong ki group na ka bynta ban ïaknieh ban ïoh rung sha ka wat kaba khatduh ne ka final round ka ban pynlong ha Assam ha u Kyllalyngkot jong u snem 2026.
Te kumta ki kynhun ki ban khur jingjop ha la ki jong ki group, kin ïasoh bad ka West Bengal kaba long ka lahduh ha u snem ba la lah bad ka Kerala kaba la wan ba-ar, ha ka wat ba khaduh kaba don 12 tylli ki kynhun ïa kaba yn pynlong ha Dhakuakhana bad ha Dhemaji.
Ka Assam ka la ïoh ban pynlong teng ïa ka Santosh Trophy Final Round ha ka aïom 2010-11 ha kaba ka West Bengal ka la pynliem noh ïa ka Manipur na ka bynta ban rah ïa ka nam lahduh ha Guwahati.
