Shillong, Naiwieng 27
U President ka Voice of the People Party (VPP) u Bah Ardent Miller Basawiamoit u la ther tyngeh ïa ka Sorkar Jylla, da kaba ong ïa kiba die met bad die drok ka Sorkar kam leh eiei hynrei ïa kiba kamai ïa ka hok ban shu tyrwa die sha die soh ha surok kim shah.
Ia kane u Bah Ardent u la pynpaw haba ïakren bad ki lad pathai khubor ha ka 27 tarik u Naiwieng 2025, hadien ba u la dep ban wan peit ïa kiba die sha die soh ha Khyndailad, kiba la shah beh ha ki briew jong ka Shillong Municipal Board.
Kane ka jingshah beh bad nym shah ki briew jong ka tnad Municipal Board ïa kiba tyrwa die jingdie ha Khyndailad kadei ha ka miet jong ka 26 tarik u Naiwieng 2025.
La sakhi ruh ha katei ka miet ki nongtrei ka tnad Municipal Board ki la knieh ïa ki tiar ki nongdie jingdie kiba shu tyrwa sha ha Khyndailad.
U Bah Ardent u la ong ba kiba die jingdie da kaba shang tyrwa ha Khyndailad, kim pynwit ïano ïano ruh bad ka jingleh jong ka Sorkar ka long ka bym ïahap satia.
“Kine kiba die jingdie kim pynduh nong ïa ka Jylla hynrei ka Sorkar kam leh ei-ei ïa kiba die drok, kiba die met bad kiwei kiwei ki kam be-aiñ kiba pynjah burom ïa ka jaitbynriew,” ong u Bah Ardent.
U Bah Ardent u la ong ba ka Sorkar ka weng ïa kiba shongdie madan mynshwa namar ki ïohi ïa ka jingkhap ngiah ka lynti ïaid, hynrei mynta kine kiba shang tyrwa die jingdie, kam don ka jingpynwit ïa ki paidbah ba ïaid ba ïeng. “Lada ki khang ban tyrwa die jingdie, ki la dei ban khangnoh ruh ïa briew ba ïaid ba ïeng ha Khyndailad,” u la bynrap.
“Kum ka party kan nym lah da lei-lei ruh ban pdiang ïa kane ka jingleh jong ka Sorkar. Ka Sorkar ka dei ban peitbniah bad ban pynshong nongrim bha bad ka dei ban pyrkhat ha kaba ïadei bad ka jingsuk ki paidbah bad ka jingim jong ki briew,” ong u Bah Ardent.
U la kdew ruh ba kine kiba tyrwa soh ha ki shang jong ki, ki tyrwa sha ha ki ketli bad leit phai sha ïing tang ban pyndap ïa ki jingdonkam ha ïing ha sem, hynrei mynta la shu shah knieh noh. “Ngi kwah tip ruh ba ka Municipal haba ka knieh, ka da buh ne-em ïa ki jingthoh, namar ki hap ban pynphai ïa ki tiar ba la knieh noh,” la bynrap u Bah Ardent.
Kumta u la ong ruh ba ka party hi ka pynpaw ïa ka jingpyrshah jur halor kane ka jingleh jong ka Sorkar.
Nalor kata, u Bah Ardent u la byrngem ruh ba lada ka Sorkar ka dangbteng ban pynwit ïa kiba tyrwa die jingdie, ngin sa ïa tyngkhuh bad ka Sorkar.
Haba kylli, u ong “Lada kim don ïakata ka Cov ka Sorkar ka dei ban pynbeit ym ban shu beh. Lada kim don ïakata ka COV ki dei ban pynïoh ha ki, haba ki donkam na ka bynta ban pynbit pynbiang ha ïing ha sem”.
