Amaravati, Naiwieng:
U Symbud Myntri Rangbah u Pawan Kalyan u la pyntip ba hapoh ka Palle Panduga 2.0, 8,571 km ki surok thymmai ki dang shna ha ka jinglut kaba la antad ba kan kot sha ka T. 5,838 klur. Nalor kata, dang buh 25 hajar tylli ki mini Gokula ha ka jinglut kaba T. 375 klur, bad 157 tylli ki Community Gokula ha ka jinglut kaba T.16 klur.
La thmu ruh ban shna 58 km ki “Magic drain” ha ka jinglut kaba T.4 klur bad ban sdang 15,000 tylli ki kam pynroi thymmai ha ki Gram Panchayat ha ka jinglut kaba T.406 klur.
U la plie ïa ka prokram Palle Pandaga 2.0 na Sivakodu, Razole konstitwensi jong ka Ambedkar Konaseema distrik ha ka sngi Balang.
U Symbud Myntri Rangbah u la bynrap ba ïa ki ïing jong ka DPRC bad ka Gram Panchayat yn shna ha ka jinglut kaba T.148 klur, katba sa T.100 klur la mang na ka bynta ki kam pynroi ha Konaseema distrik.
Ïa ka jingïarap pisa la ïoh na ka NABARD, ka Asian Infrastructure Investment Bank, bad na ki skhim kum ka Mahatma Gandhi National Rural Employment Guarantee Scheme (MGNREGS), ka 15th Finance Commission, bad ka Pradhan Mantri Gram Sadak Yojana.
U Pawan Kalyan, u la pynmih ïa ka jingmaham kaba tyngeh ïa ki nongïalam jong baroh ar ki liang pyrshah bad ïa la ka jong ka seng, da kaba ong ba tang kito kiba shim ïa ka jingkitkhlieh na ka bynta ka imlang sahlang, ka jaitbynriew bad ka kolshor jong ka, ki kamai ïa ka hok ban kylli jingkylli ïa kiwei.
Ha ka sngi riti synshar ka ri, u la ban jur ba ki samla ki dei ban kit ïa ki jingkitkhlieh ha ka imlang sahlang ban don ïa ka bor akor ban kylli jingkylli ïa ki nongïalam saiñ pyrthei.
U la pynshai ba un ym shah ïa ki nongïalam, wat hapoh ka seng Jana Sena, ki bym burom ïa ka jingsynshar paidbah, watla un ïeng beit ha ki nongrim ba kongsan jong u.
Haba jubab ïa ki katto katne ki kot khubor kiba la sngewsynei mynshwa ïa ka sorkar barim, u Pawan Kalyan u la ong ba kito kiba buh jingkylli ïa ka rekod jong ka sorkar synrop lang kaba 18 bnai ki dei ban buh jingkynmaw shwa ba kam shym la pynleit jingmut ha ka bamsap kumba leh ka sorkar barim.
U la kdew ba ki mukotduma be-aiñ kim shah mudui shuh bad ba ka roi ka par ka dang ïai bteng ryngkat bad ki lad jingïarap.
U Synbud Myntri Rangbah u la kdew ba ki nongtrei ki shah siew ha ka por kaba biang bad ba da ki hajar klur tyngka la pynlut ha ki kam pynroi. U la bynrap ruh ba ki don ki nongmihkhmat kiba ju phohsniew ïa ki jingïakhih kum ha Nepal, Bangladesh ne Sri Lanka, da kaba maham ba lada ka sorkar barim ka dang neh ha ka bor sa shisnem, kum kine ki jingkulmar ki lah ban jia shisha.
U la pynpaw ba ka sorkar synrop kan dang sah ha ka bor sa 15 snem. U la ther ïa ki nongïalam ka YSRCP ba kim shym la pynkylla ïa ka jinglong watla ki shah kyntait ha ki paidbah.
