Beijing, Naiwieng:
Ha kane ka khubor ba sniewbok, la ong ba 11 ngut ki la duh ei noh ia ka jingim hadien ba kawei ka rel ka la ioh rat ia ki nongtrei ka tnat rel ha ka thaiñ Southwest jong ka ri China ha ka Sngi Palei. Kane ka la jia ha ka thaiñ Yunnan.
Katei ka rel, ba la pyndonkam na ka bynta ban test ïa ki tiar kiba lah ban neh na ka jingkhynñiuh u jumai, la ong ba ka la ïa kum rat naphang ia ki nongtrei bylla ha Luoyang Town station jong ka Kunming, ha ka por mynstep, ha kaba 11 ngut ki la ïap bad 2 ngut ki la mynsaw jur.
Ka rel ka dang iaid kumba ju long lyngba ka kynroh hapoh jong ka Kunming Luoyang Town Station haba ka jingtyngkhuh ka la jia bad ki nongtrei bylla kiba la rung ha ka jaka ïaid rel naka bynta katei ka kam.
Ki bor pyniaid ki dang wad bniah ia ka jingjia jong kane naba wat hapdeng ka jingpyrshang jongki ban wad bniah haba iadei bad katei ka laiñ, kumno katei ka rel pat kam shym la ioh jingtip halor kane bad ba ka leit poi ïaid sha katei ka jaka ba kitei ki nongtrei ki don.
Ka leit- ka wan jong ki rel ka la bteng biang sha ka rukom ba ju long ha ka por shiteng sngi jong katei ka Sngi Palei, ha kaba kito kiba mynsaw ki la ioh jingsumar hadien ba la pynkit ia ki sha ki jaka sumar.
Ki jingjia aksiden ha ki karkhana ki long kiba ju jia khah-khah ha kylleng jong ka ri China namar ka jingduna palat jong ki kyndon pyrkhing bad ki lad jingiada bad kane ka la ktah jur ia ki riew paidbah bad ki nongtrei bylla kiba hap ban im ha kitei ki kam ki bym don jingshngaiñ bad kiba ap jingma ia ka jingim jongki.
