Shillong, Naiwieng 27
U Myntri Rangbah ka Meghalaya u Conrad K Sangma, uba dei ruh u National President jong ka National People’s Party (NPP) ha ka sngi Palei u la leit ïashim bynta ha ka jingïalang paidbah ne ka rally “The One North East Thansa (Unity) Rally” kaba la pynlong ha madan Astabal ha Agartala ha kaba da ki hajar ngut ki briew ki la ïalum ban sakhi ïa kane ka jingïeng ïatylli hapdeng ki nong-ïalam jong ka thaiñ.
Kane kan dei ka jingïalang paidbah kaba nyngkong jong ka ‘One North East’. Kane ka rally ka la bud hadien ka jingpynbna paidbah lyngba ka jingïakynduh bad ki lad pathai khubor kaba la long ha ka 4 tarik Naiwieng, 2025 ha New Delhi, ha kaba ki nongïalam ba paw khmat ka thaiñ ba kynthup ïa u Conrad ki la wan lang shakhmat ban pynbna ïa ka jingthaw ka jong ki ïa kawei ka rynsan seng saiñ pyrthei ka ban mihkhmat ïa ka thaiñ shatei lam-mihngi.
Ha kane ka sngi, nalor u Myntri Rangbah ka Jylla, kiwei pat ki nongïalam kiba la ïashim bynta na kylleng ka thaiñ ki kynthup ïa u James PK Sangma, Working President ka National People’s Party (NPP), Daniel Langthasa, Founder, People’s Party (Assam) bad dkhot barim ka MAC, Dima Hasao Autonomous Council, Mmhonlumo Kikon, Myntri barim ka Sorkar Nagaland, Author, Poet bad Social Worker, RK Meghen, nongïalam ba la rangbah, Manipur, Hemochandra Singh, lamphang barim jong ka Manipur Legislative Assembly bad Myntri barim ka Sorkar Manipur, Ajoy Edwards, Founder bad President ka Indian Gorkha Janshakti Front (Gorkhaland, Darjeeling).
Nalor kitei, ki nongïalam bahakhmat jong ka TIPRA Motha Party kata u Pradyot Bikram Manikya, nongseng ka TIPRA Motha Party; BK Hrangkhawl, President ka TIPRA Motha Party; Jagadish Debbaram, Chairman jong ka TTAADC; Purna Chandra Jamatia, CEM jong ka TTAADC; ki Myntri ba kynthup ïa u Animesh Debbarma, Brishaketu Debbarma, bad kiba bun ki MLA, ki Executive Member, ki MDC jong ka TIPRA Motha Party ki la ïadon lang ha katei ka rally.
Haba ai jingkren ha katei ka jingïalang, u Conrad u la pynpaw ïa ka jingsngewnguh kaba khraw ïa ka jingwan jong ki paidbah, bad pynpaw ruh ba kane kan dei ka por kaba myllung na ka bynta ki riewlum jong ka thaiñ shatei lam-mihngi.
U la pynpaw ba watla ka jingsngew ka la ju long ka bor kaba khraw tam jong ki briew jong ka thaiñ, hynrei ka lah ruh ban long ka jingduna, kaba pynlong ïa ka jingïatylli kaba donkam hakhmat kano kano ka jingeh.
“Kin don shibun ki briew ki ban pyrshang ban kdiah ïa ngi ha ki bynta bapher bapher. Hynrei ngi donkam ban pyndonkam ïa ka bor jong ngi ban long tylli kawei. Ïa ka sur jong phi, dei ban ïoh sngew ha kylleng ka thaiñ shatei lam-mihngi,” u la ong.
“Ka la dei ka por ba ngin ïawan lang kum kawei – kawei ka thaiñ shatei lam-mihngi. Ka jingeh kaba khraw tam jong ngi mynta ka dei ka jingïapait ïapra hapoh ka imlang sahlang. Na kane ka kyrdan, ngi dei ban sei ia ka sur jong ngi bad ban long kawei,” u la ong.
