Shillong, Naiwieng 27
Lehse ka lah ban long ka jingïalang kaba kham pher hapdeng ka jingitynnad mariang hadien ba u Myntri Rangbah ka Jylla, u Conrad K. Sangma u la pynïaid ïa ka jingïalang kaba kyrpang jong ka Kynhun Myntri kaba la long ha kawei na ki jaka jngohkai pyrthei ba pawnam ka Jylla – ka Nan Polok.
“Ngi la don ka jingïalang kaba kyrpang jong ka Kynhun Myntri mynta ka sngi. Kumba phi lah ban ïohi, ngi don hangne ha Nan Polok bad kane ka dei ka jaka jong ka prokram kaba ngi la don na ka bynta ka ‘Japanese Arena’ ha ka por ba pynlong ïa ka tamasa ‘Cherry Blossom’, kaba la bteng pat sha ka ‘Literary Festival’, bad ka ban bteng ruh sha kiwei pat ki bynta jong ka kolshor bad ki riti-dustur jong ngi, ïa kaba yn sa pyninam ha ki taïew ban wan katba ngi dang ïaid na bynta ban pynkhreh ïa ka Khristmas bad kumta, ngi la pyrkhat ba kan long kaba biang eh ban don ka jingïalang jong ka Kynhun Myntri hangne, ha kane ka jaka ban ïoh ïa ka jingsngew jong ka tamasa baroh kawei bad ha kajuh ka por, ban ailad ruh ïa ka Kynhun Myntri ban long shi bynta jong kine ki tamasa baroh kawei bad ki prokram kiba ngi pynlong,” ong u Conrad haba kren sha ki nongthoh khubor hadien ka jingïalang.
“Ka dei ka jingïalang Kynhun Myntri kaba kyrpang namarba ka la long kaba jrong bha bad ka la jan don saw kynta ba ngi la don hangne,” u la ong haba pyntip ba ka jingïalang ka la pynkhuid haduh 16 tylli ki ‘agenda’ kiba ïadei bad ka roi ka par jong ka Jylla.
