Shillong, Naiwieng 27
U Bah Lahkmen Rymbui uba dei u Myntri ba khmih ïa ka tnad Aiñ u la ong, ba ka Sorkar Jylla kan sa khmih bniah bad kan sa leh katkum ka jingshah jong ka aiñ, pyrshah ïa kito kiba sah be-aiñ ha Maxwellton Estate bad ha Mahadev Khola.
U Bah Lahkmen u la pynpaw ïa kane hadien ka jingïakynduh bad ki nongïalam ka KSU Sengkmie kiba la dawa ban kyndang noh ïa ki briew kiba sah be-aiñ ha Maxwellton Estate bad ha Mahadev Khola.
“Ki nongïalam ka KSU kila dawa ba ka Sorkar ka dei ban kyndang noh ïa ki briew kiba sah ha Maxwelton Estate khlem da ïoh bor namar ba ka jingdon jong kine ki nongshong hangto khlem ki nongpeit ka wanrah ïa ka jingbym shong shngaiñ bad sheptieng ïoh kan kylla long kum ka ktem ka ban pynmih ïa ki jingsniew ki ban ktah ïa ka suk ka saiñ hapoh Shillong bad ha ka jylla,” ong u Bah Lahkmen haba kren sha ki nongthoh khubor ha ka sngi Palei.
“Kumba ngi sngewthuh ki don ki longïing kiba sah hangto bad u don uba kam trai ïa kane ka jaka hynrei ka ïingbishar kala ai ïa ka rai. Ngin sa khmih bniah ïa kaei kaba ngi dei ban leh bad ngi hap ban leh katkum ba shah ka aiñ,” u la ong.
Ha kaba ïadei bad ka jingdawa ban kyndang ïa ki briew ba sah be-aiñ ha Mahadev Khola, u Bah Lahkmen u la ong, ba ka dei ka sien kaba nyngkong ba un ïohsngew shaphang kane ka jaka, kumta un sa lum ïa ka jingïalang halor kane ka jingdawa.
“Ngan sa lum ïa ka jingïalang bad ka tnad Revenue bad DC Revenue ban snewthuh ïa ka jinglong jingman jong kitei ki ar tylli ki jaka bad kaei kaba kin leh, khnang ba ka dei ban don ka lynti kaba kin ïaid nangne shakhmat,” la ong u Myntri.
