Shillong, Naiwieng 27
Hadien shi sngi ka jingshah beh kiba tyrwa sha bad tyrwa soh ha Khyndailad ha ki briew ka Shillong Municipal Board, na ka liang u Presdient ka Voice of the People’s Party (VPP) u Bah Ardent Miller Basawiamoit uba dei ruh u MLA ka Nongkrem ha ka sngi kaba bud, kata ka 27 tarik u Naiwieng 2025, u la leit sha Khyndailad ban ïakynduh ïa ki longkmie kiba la shah khang tyrwa die sha die soh bad kiwei ki mar.
Ha kane ka sngi, ïa u Bah Ardent la wan ban synranlang da u Executive Member Bah Powell Sohkhlet, u Chairman jong ka Khasi Hills Autonomous District Council (KHADC) Bah Strong P Kharjana bad kiwei kiwei de.
U Bah Ardent u la ïakren bad ki nongtrei ka Municipal Board ban kylli, ba kaei ka daw ba ki beh bad ym shah ïa kiba tyrwa soh bad tyrwa sha ha surok.
Ha ka jingïakren, na ka liang u Bah Ardent u la phah leit noh ïa ki nongtrei ka Municipal na Khyndailad sha ophis treikam jong ki, da kaba hukum ruh ba kim dei shuh ban dang pynwit ïa kiba tyrwa sha bad soh ha Khyndailad.
U Bah Ardent u la dawa da ka jingthoh na ki briew ka Municipal, ba ym shah ïa ki briew ba shu tyrwa die jingdie ha Khyndailad, da kaba shu ïaid ruh. “Haba phim shah shuh wat ïa kiba shu ïaid tyrwa die jingdie ban ïaid kylleng ka surok, ïa ki briew ruh dei ban khangnoh bad ym bit shuh ban dangshah ïaid ha Khyndailad,” ong u Bah Ardent ïa ki nongtrei ka Municipal.
U la ong, “Ban khang ïa kiba shu ïaid tyrwa die jingdie ha ki surok, ngin nym lah ban pdiang da lei-lei ruh em”.
U Bah Ardent u la hukum ruh ïa ki briew ka Municipal ban leit ïathuh sha ka Sorkar, ba u Bah Ardent um shah ban beh ïa kiba tyrwa die jingdie ba shu ïaid ha ki lynti khlem da pynwit ïa ki briew ba ïaid ba ïeng.
“Ngi sngewthuh, haba leh ïa kano-kano ka kam, dei ban ïa sngewthuh lang baroh. Hynrei mynta shu khanglad kat ïa kaba don ka kam. Peit ïa ki jingsniew kiba don bad kiwei ki jaitbynriew kiba lah rung shane bad kiba la ïoh ban treikam treijam shane,” la ong u Bah Ardent.
Kumta u la kyrpad ïa ki briew ka Municipal ba sngewbha ban leit noh sha ki ophis treikam, bad ïathuh ba wan u Bah Ardent kim shah ban beh ïa kiba tyrwa die jingdie, namar lada phi don hangne kan nym long bad ngin nym shah hi ruh, da kaba bynrap ruh ba kane ka jingleh jong ka Municipal kam long ha ka lynti kaba dei.
“Lada ki pynwit ha ka leit ka wan jong ki paidbah, hooid kadei hok ban nym shah ïa ki, hynrei mynta bapli ki shu tyrwa kylleng kylleng ki surok ban shu khang kan nym long,” la bynrap shuh shuh u Bah Ardent.
U la ther tyngeh ruh ïa ka Sorkar Jylla, ba ki kam be-aiñ kiba pynduk ïa ka Jylla kim lah ban khang bad kane ka bym don jingktah ïano ïano ruh, kaba pynmyntoi ïa u paidbah ba duk ba suk phi wan ban khang.
