Shillong, Naiwieng 27
Ka Joint Secretary jong ka Nutrition and Dietetics Association of Meghalaya (NDAM) ka Kong Laribha Dohtdong ka la ong ba ki jingbam ki ba la song lypa (Processing Food) na ki karkhana ki long kawei ka daw bah ba kem pang ki khynnah namar kine ki jait jingbam kim dei kiba tei met.
Ïa kane Kong Laribha ka la pynpaw ha ka jingïakren sha ki nongthoh khubor ha ka sngi ba la pyntip paidbah ba la seng ïa ka Nutrition and Dietetics Association of Meghalaya (NDAM) ka seng ka ba nyngkong ban shim ïa ka bynta ban ïalap paidbah halor ka rukom bam ïa ki jait jingbam ba lah tei met.
Ka Kong Laribha ka la ong ba hapoh ka NDAM ki don ki riewshemphang kata ki Nutritionist, Dietician bad ki nonghikai ha ka liang ka bam ka dih bad ki ba la tbit ban ïalap paidbah halor ka jingdonkam ban tip shaphang ki jait jingbam ba lah ban tei met.
Shuh-shuh ka Kong Laribha ka la ong ba ki jingwad biah ki ïathuh ba ki jait jingbam khutia ba la song lypa (Processing) kiba die harud surok ki wanrah shibun ki jait jingpang. “Lada u briew/ka briew ki ba khia kilo ki bam kum ïa kine ki jait jingbam kan ktah pat ïa ka jingdon ka khleiñ bad ka warah ruh ïa ka jingpang High Blood Pressure, ka jingpang shini, ka jingpang klongsnam” ka la ong.
Haba bynrap ka la ong, ki paidbah ki dei ban long kiba phikir ban jied ïa ki jait jingbam ban bam bad ban wad bniah, hato ki jingbam ba ki bam ki dei kiba tei met ne em. Ka la ong ba “Ngi na ka liang ka NDAM bad na ka FSSAI ngi ju bthah ïa ki paidbah ba ki dei ban bam da ki jingbam ba tei met, khnang ban lait na ki jait jingpang kum ka jingkiew ka jingkhia kilo, jingpang duna snam bad kiwei ki jingpang.”
Ïa ka NDAM la seng la kumba katto katne bnai eiei bad ka la ïoh ïa ka jingithuh na ka Sorkar ha ka 27 tarik Nailur 2025 bad ka 27 tarik Naiwieng 2025 ka dei ka sien long jingïalang ba nyngkong jong ki dkhot ka Executive Committee (EC) jong ka seng.
