Shillong, Naiwieng 27
Ka Meghalaya Commercial Truck Owner and Driver Association (MCTODA) ka dap da ka jinglyngngoh ba ki trai karkhana dewbilat kiba don hapoh ka shatri ka Jaintia Hills Cement Manufacturer Association ki kyntait ba ki khlem mynjur ban siew ïa ka dor kit dewbilat kaba long T.9 ba la buh da ka Sorkar.
Haba kren sha ki nongthoh khubor u Bah Moskalender Marngar, Chairman ka MCTODA u la ong ba ka long kaba sngewlyngnoh bad diaw mynsiem bha ban mih na ka jingïalang ba la long ha ka sngi Palei namar ba ki trai karkhana dewbilat ki la kyntait ba ki mynjur ïa ka dor bad pan por biang ban ïakren ïa ka dor, kaba long T.9 shi metrik ton ha ka shi kilometre.
U la ong ba ka MCTODA kam lah ban pdiang ïa ka jingleh jong ki trai karkhana dewbilat, ha kaba ki khlem kheiñ snep ïa ka Sorkar kaba la donlang ha ka jingïalang, ïa kaba ki trai karkhana dewbilat ki la dep pynpaw ka jingmynjur ïa ka dor, u la ong “Haba ïadei ka dor ka MCTODA ka pyn-eh beit ba dei ban pynneh kumba la dep mynjur ha ka jingïalang kaba la long ha ka 13 tarik Naiwieng 2025”.
U Bah Moskalender u la pynpaw ba ka MCTODA kam hun satia ïa ka jingshim rai ka Sorkar, ba ki nongñiah trok trai Jylla ki hap ban pdiang da ka ‘Quota System’ hynrei kim lah leh eiei namar ba ki artylli ki Association ba na Jaintia Hills ki pdiang ban ïaid ïa ka rai jong ka Sorkar.
