Khliehriat, Naiwieng 27
Ki bor pynïaid District jong ka East Jaiñtia Hills, Khliehriat ki la lum ïa ka jingïalang ha ka 27 tarik Naiwieng ha ka jingdonlang u Ma Kyrmen Shylla, MLA ka Khliehriat Konstitwensi bad ka Kong Santa Mary Shylla, MLA ka Sutnga Saipung, ki MDC, ki dkhot jong ka District Selection Committee (DSC), ki nongpynïaid skul, ki nongmihkhmat aiñ, bad kiwei kiwei ki nongshim bynta bapher bapher ban weng ïa ki jingeh ba kongsan kiba ïadei bad ki rukom thung kam ha ka DSC.
Ka jingïalang ka la long hadien ka shithi bala ïoh pdiang na u R Siangshai bad u Advocate K Ksoo da kaba pynpaw ïa ki katto katne ki mat, kynthup ka jingpynbna ïa ki Cut-Off Marks, ki Interview Ratio bad ka jingdonkam ban don ka jingïakren kaba shai bad ki kyrtong ban long ka jingthung kam kaba khuid ba suba.
Ka jingïalang kala rai ban pynbha ha ka rukom thung kam da kaba pynmih ïa ka Qualifying ne Cut-Off Marks hadien ba la dep ban pynmih ïa ka Final result. La pynthikna biang ba haba khot ïa ka ‘Personal Interview’ kan long 1:2 ka Interview Ratio.
Ban pynthikna ïa ki kyrtong shaphang ki tarik ba donkam, la rai ban phah da ka email bad SMS. Ban kyntiew ïa ka jingkitkhlieh ha ki kyrtong la rai ba baroh ki Provisional Answer Keys bad Final Answer Keys yn buh ha ka Website ka DSC hadien ba la pynbna ïa ka eksam.
Nalor kata, la rai ba ka DSC kan wad ki lad ki lynti ban khang shipor ïa ka internet da kaba pyndonkam da ki jammer, yn buh ïa ki kor CCTV ha ka por eksamin ban ïada na ka jingleh tuh ha ka por thoh eksamin.
La rai ruh ba hadien ba la pyndep ïa ka eksamin, yn pynbna paidbah ïa ki mark jong baroh ki kyrtong bad yn pyni paidbah ha ka website ba pura jong ka district.
Ka bor synshar District ka la pynpaw biang ïa ka jingkular jong ka ban pynthikna ïa ka jinglong hok, ka jinglong khuid, bad ka jingtreikam kaba paka ha baroh ki kam kiba ïadei bad ka jingpynrung kam.
