Khliehriat, Naiwieng 27
Ki nongshong shnong jong ka Shnong Daistong kaba hap hapoh ka Elaka Nongkhlieh East Jaiñtia Hills District ki la mih paidbah ha ka 27 tarik Naiwieng ban pynpaw ka jingpyrshah kaba jur ïa ka public hearing ba la khot pynlong da ka Meghalaya State Pollution Control Board (MSPCB) ha ka 19 tarik Nohprah na bynta ban seng ïa karkhana pynmih dewbilat ba thymmai ïa kaba la tip kum ka ‘Khara Siang Lum Pyrshin’ kaba ha ka shnong Daistong East Jaiñtia Hills District.
Kane ka karkhana pynmih dewbilat ba thymmai ka dei ka M/S Shree Cement Plant Limited bad ka thmu ban pynmih ïa u clinker 0.95 million Total Per Annum (TPA) bad ka dewbilat 0.99 million TPA, kynthup ka CPP (15 MW), WHRS (7 MW), bad DG sets.
Ki nongshong shnong naduh ki longkmie longkpa, ki samla kynthei bad shynrang kila rah lang ruh ryngkat ki banner kiba thoh, ‘Pynneh pynsah ïa ka mariang, ngim pdiang ïa ka M/S Shree Cement Plant Limited’, ‘Ngi pyrshah ïa ka jinglehbor u Waheh Shnong ban ai NOC khlem ka jingtip ka Dorbar Shnong’.
“Ngi kyndit ban ïohi ïa ka jingpynbna paidbah da ka Meghalaya State Pollution Control Board, namar kum ki nongshong shnong ngim don jingtip eiei ba u Waheh Shnong Ma Himon Pajuh u la dep ban ai NOC sha katei ka kompeni,” ong u Ma Chwamiki Patwet haba kren sha ki lad pathai khubor.
U la ong ka daw kaba pynlong ïa ki ban ïeng pyrshah ïa katei ka karkhana M/S Shree Cement Plant Limited, ka long ba kan sa ktah ïa ka mariang bad kumjuh ïa ki nongshong shnong namar ka jaka ba thmu ban tei ïa ka, ka jngai ym duna hapoh shi kilomiter eiei.
Nalorkatta u la pyntip ba ki nongshong shnong ka Daistong 100 percent dei kiba im da ka rep ka riang kum u kba nalor kiwei kiwei ki mar rep. Lada kane ka karkhana kan ïoh lad ban ïeng hapoh ka shnong kan ktah ym tang ïa ka koit ka khiah jong ki nongshong shnong bad ki shnong ba marjan hynrei wat ïa ki mar rep mariang, ki um ki wah bad baroh ki jingthaw ba im.
U Ma Patwet u la pyntip ba shwa ban ai NOC, kala don ka jingïakut hapoh ka dorbar shnong kaba la long ha 8 tarik Nailur, kaba la pynbeit ban ïashong pyrkhat shwa tang ki dkhot ka committee ryngkat ki katto katne ki riew rangbah bad kaba mih na kata jingshong pyrkhat yn wanrah biang hapoh ka Dorbar, hynrei u waheh shnong u khlem la wanrah hapoh ka Dorbar.
Halor kane ka jingpyrshah ka jong ki, u Ma Philemon Sukhlein u la ong ba kila dep ruh ban buh ïa ki kot ki sla sha ophis Meghalaya State Pollution Control Board (MSPCB) kumjuh sha ophis Jaiñtia Hills Autonomous District Council (JHADC) naduh ka 13 tarik Risaw, 2024 hynrei ka long sepei namar kim ïoh jubab eiei na ka liang kitei ki artylli ki ophis treikam paidbah.
“Ngi kum ki nongrep ngin ym ailad ïa katei ka kompeni ba kan treikam hapoh u pud u sam jong ka dorbar shnong namarba kan pynmih ïa ki jakhlia bad pynjot ïa ki hali bad pynthor rep kba kiba don sawdong katei ka jaka ba thmu ban tei ïa katei ka karkhana khamtam kan pynduh pyndam ïa ki tyllong umbam umdih,” la ong u Ma Philemon Sukhlein.
Kaba pynkthang bad pynsngewsih tam ïa ki kum ki nongshong shnong ka dei ka jingshah shet kylla ha ka Elaka, la ong u Ma Philemon bad bynrap ba ha ka Dorbar Elaka la ïa mynjur lang da baroh ban tei ïa katei ka karkhana ha ka jaka kaba tip kum ka ‘Lum Ryngksan’ kaba jngai na ki jaka rep jaka riang jong ki nongshong shnong Daistong, hynrei kaba pynkyndit pat ka dei hadien ka jingpynmih ïa ka jingpynbna paidbah ba ïa katei ka karkhana thymmai pynban la ai NOC ban tei ha ka jaka kaba tip kum ka ‘Khara Siang Lum Pyrshin’ kaba jan tam na ki jaka rep jaka riang.
Kitei ki nongpyrshah ki pynrem jur ïa ka EC jong ka Elaka Nongkhlieh, kumjuh ka EC jong ka Dorbar Shnong Daistong bad ïa u Waheh Shnong kiba la leh donbor halor kane ka kam ïap kam im khlem ka jingmynjur lang u paidbah ba bun balang.
