Shillong, Naiwieng 27
U Symbud Myntri Rangbah ba khmih ïa ka tnad Transport u Bah Sniawbhalang Dhar u la pyntip ba ki trai ki karkhana pynmih dewbilat ki la mynjur ban ai ka bhah ba 120 tylli ki trok man ka sngi sha ki nongñiah trok trai Jylla, ha kaba 100 tylli ki trok kin sdang noh naduh ka 28 tarik u Naiwieng katba 20 tylli tylli pat yn sadang ban pyntreikam naduh u Nohprah 2025.
Ïa kane ka rai la shim ha ka jingïalang kaba la long ha ka sngi Palei kaba la ïadonlang ki nongmihkhmat jong ka Jaiñtia Hills Cement Manufacturers Association (JHCMA) bad ki lai tylli ki seng ki nongñiah trok ba kynthup ka Jaiñtia Hills Truck Owners & Drivers Association, East Jaiñtia Hills Truck Owners & Transporter Association bad ka Meghalaya Commercial Truck Owner and Driver Association.
U Bah Sniawbhalang Dhar u la ïathuh ba ki seng nongñiah trok ki la pan ban ailad shuwa ïa ki trok trai Jylla da kaba pynkiew ruh ïa ka bhah na ka 80 tylli ki trok sha ka 120 tylli ki trok man ka sngi.
“Ki trai karkhana dewbilat ki la mynjur ban ai 120 tylli ki trok man ka sngi, na ka jingdawa jong ki nongñiah trok bad ki seng trai trok bad ki 100 tylli ki trok kin sdang noh naduh lashai katba 20 tylli pat kin sdang naduh ka u bnai Nohprah,” la ong u Bah Sniawbhalang.
Shuh-shuh u la ïathuh ba ki la ïakren ruh halor ka jingbuh dor ïa ka ‘Inter-state-rate ha kaba kin sa ïakren bha, ynda la dep ban bishar bha bad ka tnad aiñ (Law ) namar ka Jylla Meghalaya kam lah ban buh dor na ka bynta ki mar ba kit shabar ka Jylla katba ka jingkit hapoh ka Jylla hi kan neh ha ka dor T.9 kumba la rai ha ka jingïalang kaba la dep.
U Bah Sniawbhalang la ong ba kat haduh mynta ki trai bad nongñiah trok kin ïaid shuwa ïa ka dor 9 tyngka, hynrei lada kane ka dor ka neh sah ka lah ban ktah ïa ki paidbah na ka jingkiew dor ka dewbilat, kumta la ïakren ba kan sa don biang ka jingshong ban ïakren pynbeit bha ïa ka dor.
