Rangsakona, Naiwieng 27
Ka Congress ka la nang ïoh bor shuh-shuh ha rilum Garo, kata hadien ka jingwanphai jong u Zenith Sangma, mynta sa ka kurim jong u ha ryngkat bad ki hajar ngut ki nongkyrshan ki la pynïasoh biang sha ka Congress. Kane ka jingwan pynïasoh jong kine ki nongïalam ba mynshwa, kan nang aibor bad pynkhlaiñ ïa ka Congress khamtam ban pynkhreh bad ïakhun ïa ka ilekshon MDC sha GHADC ka ban long ha u snem ban wan.
Ha ka jingïalang kaba la long ha Rangsakona, kaba dei ka konstitwensi kaba la mihkhmat teng da u Zenith bad kaba la wan hadien ba u la pynïasoh biang sha ka Congress ha u bnai Risaw, kaba la plie lynti pat na ka bynta ki nongkyrshan jong u, ban leit ïasoh biang sha ka Congress.
Ka Sadhiarani Sangma, kaba dei ka kurim u Zenith, kaba la ïakhun ïa ka ilekshon arsien na ka tiket jong ka TMC bad shisien na ka tiket ka Congress, ha baroh lai tylli ki jingïakhun ka la wan ha ka kyrdan kaba ar. Hadien ka jingpynïasoh sha ka Congress, ka Sadhiarani kaba dang dei ka MDC ba mynta ha GHADC, kan sa kylla long tang maka, marwei ka MDC jong ka Congress hapoh ka Council.
Ha ka jingïalang kaba la long ha ka 26 tarik mynta u bnai ha Rangsakona, kiba bun ki nongkyrshan jong u Zenith Sangma ki la ïashim bynta bad ban pynskhem biang ïa ka jingkyrshan jongki ïa ka Congress.
Ïa kane ka jingïalang la pynïaid da ki nongïalam ka Congress ba kynthup ïa u Dr A Chellakumar uba dei peit ïa ka Congress ha Meghalaya, u President ka MPCC Bah Vincent H. Pala, u Saleng A. Sangma, MP ka Tura, ka Deborah C. Marak kaba long ka Working President ka MPCC.
Ka Congress ka la pynpaw ba ka jingpynïasoh ki paidbah ka pyni ba ka jingpyrshang jong ka bad ka bteng ban dang ïaid shakhmat ban pynskhem ïa ka nongrim jong ka, bad ka seng, ka sakhi ruh ïa ka jingwan pynïasoh biang ki nongïalam bad ki nongkyrshan ha ka por ban dang wan.
