Shillong, Naiwieng 27
Ka jingpynmih dud ha ka Jylla ka dang duna bha ban ïa ka jingdonkam jong ki paidbah, ïa ka kam ri masi ai dud dang donkam ban pynkhlaiñ bad pynshlur ïa ki nongshong shnong ban trei ïa kane ka kam khnang ban lah ban pyndap ïa ka jingdonkam dud ka Jylla.
Ïa kane la pynpaw da ki nongri masi aidud ha ka sngi Balang ha ka jingrakhe ïa ka National Milk Day kaba la long ha Central Dairy Campus, Mawïong, ïa kane ka jingrakhe la pynlong da ka Directorate of Dairy Development kaba long kum ka dak ban kynmaw burom ïa ka sngikha u Dr. Verghese Kurien.
Ha kane ka jingrakhe la ïadonlang u Director ka Dairy Development u Bah Lon Steady Shangpliang, ka Deputy Commissioner Food Safety Enforcement Shillong ka Kong D.B.S. Mukhim ha ryngkat ki bor pynïaid skul, ki khynnah skul bad ki nongri masi aidud.
Ka Kong Mina Mary Wahlang ka nongri masi aidud haba ïoh ban ïakren ka la ïathuh ba ka kam ri masi aidud, ym tangba ka ai jingmyntoi na kaba pynmih dud ban ïoh pisa, hynrei kan ai jinghikai ruh ïa ka jingim briew ba man ka sngi ban sngewthuh ïa ka jingkordor jong ka por bad ka ai ruh ïa ka met kaba shait ba khlaiñ namar ka hikai ban thiah dang kloi, khie dang step ban pyndep ïa ki kam aibam masi ka dei ka kam lajong ka pynlaitluid ruh ïa ki jingmut jingpyrkhat.
“Nga ju shah kren beiñ ha ki briew ba nga dei ka nongri masi aidud, hynrei nga ïaleh ban pyn-eh ban ïaishah ïa ki jingkren beiñ bad nga shim ba kane ka dei ka kam ba nga lah ban kyrshan ïa ka ïing ka sem” la ong ka Kong Mina.
Shuh-shuh la ïoh ruh ban ïakren ïa u Bah Goerge Colnes Ryntathiang, Secretary ka La-i-Sap Dairy Co-operative Society uba la ïathuh, ban trei ïa kane kam ri masi aidud kam dei kaba eh, lada don ka jingpynleit jingmut bad ka jingïaishah.
“Ka kam ri masi aidud, kam dei kaba eh bad ki briew kim dei ban pynsngap ïa ki jingeh, hynrei ki dei ban ïaishah bad tur ïa ki jingeh bad kaba donkam ka long ban ïoh ïa ka jinghikai, lym kumta ka long kaba eh shibun”la ong u Bah Goerge.
U la ong ba ka Jylla ka donkam dud palat shi lak litar man la ka sngi hynrei ka jingpynmih dud ha ka Jylla ka dang duna sha ba palat, ha kaba ki nongri masi aidud ki lah ban pynmih dud tang kumba 10-15 hajar litar ha ka shisngi.
Namarkata, ban lah ban pyndap ïa ka jingdonkam dud ha ka Jylla, ka donkam ban bun ki nongri masi aidud, u la kyntu bad pynshlur ïa ki khun samla ban shim ïa kane ka kam bad ban trei janai khnang ba kan long ka jingmyntoi bad kan ïarap ban ai kam ruh ïa ki khun samla.
