Shilong, Naiwieng 27
U Myntri ba khmih ïa ka tnad pule-puthi ka Sorkar Jylla, u Bah Lahkmen Rymbui u la ong ba ka Sorkar Jylla kan sa pyntreikam noh ïa ka rukom siew tulop ne ka ‘Pay Structure’ sha ki nonghikai SSA shwa ka Khrismas.
Ia kane u Bah Lahkmen Rymbui u la pyntip sha ki nonghikai SSA kiba hap hapoh ka shatri jong ka Meghalaya SSA School Association (MSSASA) ha ka jingïa kynduh bad u ha ka sngi Palei jong ka taiew.
Haba kren sha ki lad pathai khubor, u Bah Aristotle Rymbai, President, u la ong ba ka seng ka leit ïa kynduh ïa u Myntri, u Bah Lahkmen Rymbui, kum ka jingbuddien biang halor ki mat jingdawa jong ka seng.
U Bah Aristotle Rymbai, u la pyntip ba na ka liang u Myntri u la kular, ba shwa ka Khrismas ka Sorkar kan sa pyntreikam noh ïa ka ‘Pay Structure’ na ka bynta baroh ki nonghikai SSA ha ka Jylla.
“U Myntri u la ong ruh ba ka kam mynta ka la ïaid shaid shaid bad yn pyntreikam noh ïa ka ‘Pay Structure’ hashwa ka Kristmas,” la ong u Bah Aristotle.
Kumta u Bah Aristotle u la kyntu ïa u Myntri ba un tuklar lem bad ban leh ei-ei noh ïa ki mat jingdawa jong ka sen, ba kynthup ïa ka rukom siew tulop (pay structure) bad ban pynbeit ha ka por kaba biang ïa ka rukom pynbeit ïa ki skul SSA.
“Ngi la kyrpad ïa u Myntri ba un leh kloi ïa kane ka kam ha shwa jong ka por long skul, bad na ka liang u Myntri ruh u la kular ba ka Sorkar kan sa pyrshang katba lah ban pyndep,” la ong shuh shuh u Bah Aristotle.
Nalor kata, u Bah Aristotle u la ai khublei ruh ïa ka Sorkar Jylla ba ka la shim ïa kane ka sienjam bad pynbeit ryntih noh ïa ki skul SSA.
Ha ka jingïakren, na ka liang u Myntri u la pynpaw ba ki kam ban pynbeit ryntih noh ïa ki skul SSA kan dangkham shim por namar ka Sorkar kan hap ban ïa syllok bad ki kynhun ba don bynta ha ki skul Missionary bad ki skul shimet ruh kumjuh, la bynrap u Bah Aristotle.
Haba ïadei pat bad ka jinghap ban thoh ïa ka eksamin Teachers Eligibility Test (TET) ki nonghikai, u Myntri u la pyntip ba ka Sorkar hi ka la pynkhreh ïa ki kam ba donkam na ka bynta ban pynlong ïa ka exam, hynrei ka la pan ïa ka jingpynshai halor ki kyndon treikam na ka bynta ki nonghikai kiba la don lypa ha ka kam.
U Myntri u la ong ruh ba ha ki taïew ban wan, un sa leit hi sha Nongbah Delhi ban ïa kynduh ïa ki ba dei peit ha ka Ministry of Education ban ïakren bad pan jingpynshai halor kane ka kam.
