Washington, Naiwieng:
Ka United States, ka la pynsangeh noh ia ka jingpyntreikam ia baroh ki kam ‘immigration’ jong ki trai ri Afghan, hadien ba arngut ki shipai National Guard jong ka Us, ki la shah siat hajan White House ha Washington DC. Kane ka jingleh jong ka sorkar u Trump pyrshah ia ka Afghanistan ka long hadien ba uwei u nong Afghanistan u la shah kem noh hadien ba u la siat iap ia 2 ngut kitei ki nong-ap pahara ha ka por mynsngi.
“Naduh mynta, ka jingpyntreikam ïa baroh ki jingkyrpad ban wan rung sha ka ri kiba ïadei bad ki nongshong shnong jong ka Afghanistan, kin sangeh noh khlem kut por katba dang ap ïa ka jingbishar kaba bniah haba iadei bad ki kyndon pahara bad ka jingpeit bniah,” la ong ka tnat jong ka US ha ka jingpynbna hapoh ka rynsan ‘X’.
Namar la ong ba ka thong jong ka US, ka long hi nyngkong eh ka jingïada bad jingshngaiñ jong ka ri bad jong ki paid nongshong shnong jongka.
Kane ka sienjam ka long hadien ba u Trump u la byrngem ban pynbun ar shah ïa ka jingpyrshang jong ka sorkar jong u, ban pynkynriah ïa ki nongwan buhai shnong bad ai jingmut ba u lah ban bishar bniah shuh shuh ïa ki nongwan buhai shnong kiba la wan poi na Afghanistan hadien ba ki lehnoh Taliban ki la shimti ïa ka bor synshar ha katei ka ri ha u snem 2021.
Kumta, ruh u la kren shai ba mynta, ka US kan bishar bniah bin pa bin ïa uwei pa uwei u nongwei u nongbuhai shnong u ba wan rung sha US.
Kane ka jingshah siat ki dkhot jong ka National Guard, ha ka sngi shwa ka sngi ai khublei, ka wan ha ka por ba ka jingdon jong ki shipai ha ka nongbah jong ka ri bad kiwei kiwei ki nongbah ha kylleng ka ri, ka la long ka mat kaba la pynmih da ki bnai, kaba la pynmih ïa ki jingïakynad ha ki ïingbishar bad ka jingïakren kaba kham jylliew halor ka jingpyndonkam jong ka sorkar Trump ïa ki kam runar kum ka jingeh jong ki shipai.
Utei u nongsiat, u ba la ithuh kum u Rahmanullah Lakanwal, u ba dang 29 snem ka rta bad u dei u nongwan buhai shnong na Afghanistan uba la wan sha US ha ka por ba don ka kynrum- kynram jong ka jingweng Afghanistan ha u snem 2021 bad la pynshong biang ia u ha Bellingham, Washington. U la rung sha America hapoh ka Operation Allies Welcome, ka prokram jong ka sorkar Biden kaba la pynkynriah bad pynkynriah jaka ïa ki phew hajar ngut ki nong Afghanistan hadien ba ka US ka la mih noh na kane ka ri.
Utei u briew u ba don ha patok ruh u la shah siat bad u don ki jingmynsaw ki bym da ap jingma ia ka jingim jong u.
Kane ka jingthmu ka la wanrah kumba 76,000 ngut ki briew sha US, kiba bun na ki ki la trei ryngkat bad ki shipai bad ki nongmihkhmat jong ka US kum ki nongrah ktien.
Naduh katei ka por, ki la mad ïa ka jingbishar bniah kaba jur na u Trump bad ki paralok jong u, ki Republican kiba don ha ka dorbar thawain bad ki katto katne ki nongpeitkai jong ka sorkar halor ki jingduna ha ka rukom bishar bniah bad ka jingsted jong ki jingpdiang, wat haba ki nongïakhih ki ong ba ka la ai jingim ïa ki briew kiba don ha ka jingma na ka jingshah pynshitom beiñ jong ki Taliban.
