Shillong, Naiwieng 27
U Pynshailang Lyngdkhoi u la long u rangïalehkai ba kynsai na ka bynta ban pynlong ïa ka Meghalaya Police F.T ban pynliem noh ïa ka Umlyngka da 4-1 kol ha ka lympung ïalehkai SSA Champions Cup 2025, katba lahduh jong ka SPL ka Langsning FC ka la jop da 2-0 kol ïa ka Mylliem Lum ha ka sngi Palei ha SSA Stadium, First Ground, Polo.
Ïa kine ki saw tylli ki kol la thep da u Pynshailang ha ka minit kaba 53, 55, 57 & 70, katba ka Umlyngka ka a pynphai kylla shi kol lyngba ka penalty ba la shut da u Anthony Kharkongor (45+2).
Ha kane ka kynti ïakhun ka Umlyngka ka la hiar madan da kawei ka sur ïalehkai bad kata ka long ban pynskhem beit ïa la ka kut ïalehkai (defend) bad ha ka juh ka por ban pyrshang ruh artad ban ñion shakhmat (attack) ha kaba kane ka la buh jingeh bha ïa ki rangïalehkai ka MLP.
Hynrei haba bteng ïa ka kylla miet, ka MLP, kaba la sngewthuh ïa ka buit ïalehkai ka Umlyngka bad na ka jingtbit u Pynshailang ka la long ka jingïarap ïa katei ka kynhun ïalehkai jong ki pulit na ka bynta ban thep kol kylla.
Ïa ka kol kaba nyngkong u Pynshailang u la ïoh ban thep hadie ba u rangapkol ka Umlyngka u Babitlang Wahlang, um shym la lah satia ban khanglad. Ïa ka kol kaba ar u la ïoh ban thep hadien bym shim la ïamir jingmut bha hapdeng ki rangïalehkai ‘dien bad u nongapkol ka Umlyngka, kaba hangne u Pynshailang da ka jingsted u la khyrwit hi jlang, katba ïa ka kol kaba lai, une u snar thep kol ka MLP u la ïoh shwa ban pyndei da ka khlieh ïa ka bol. Katba ka kol kaba saw bad kaba khatduh u la lah ban thep lyngba ka jingtrei shitom jong u.
Haba phai pat sha ka jingjop ka Langsning, ïa ki artylli ki kol jong ka, la thep da u Richie Kharbani (36) bad u Donlad Diengdoh (67).
Da kane ka nam jop, ka Langsning ka la ïoh ban khur 6 poiñ, bud pat sa ka MLP kaba la ïoh 3 poiñ, katba ka Mawkasiang bad ka Mylliem Lum ki la ïoh mar shi poiñ, katba ka Umlyngka kam pat shym la lah ban khur jingjop.
Ha ka sngi Thohdieng ka jingïalehkai jong ka Group-B ka long hapdeng ka Mawlynrei kan ïakhun pyrshah ïa ka Shillong Lajong FC ha ka por 1 baje mynsngi, katba ka Mawkriah West ïa ka Laitkyrhong ha ka por 4:30 nohphai sngi.
