Shillong, Naiwieng 27
Ka India ka la mad ïa ka jingshah rem da 408 ron ha ka South Africa ha ka jingïalehkai Test kaba ar kaba la long ha Barsapara Cricket Stadium ha Guwahati.
Ha ka sngi kaba san jong kane ka jingïalehkai Test ba nyngkong eh ha Guwahati, ka India ka la donkam ban kamai 549 ron ha ka pali kaba ar na ka bynta ban pynliem ïa ka kynhun ba la ïalam da u Temba Bavuma, hynrei kane ka kynhun jong u Rishabh Pant ka la lah ban kamai tang 140 ron ha ki 63.5 over. Ka jingshah rem ha Guwahati, kaba dei kaba khraw tam jong ka India ha kane ka jingïalehkai kaba la neh san sngi bad kaba la pynpaw ïa ka jingbym kwah ban dangailad shuh ïa u Gautam Gambhir ban don bynta kum u coach. U Gambhir u la long u coach ba nyngkong eh jong ka India ban shah rem ha ki san tylli ki Test ha la ïing.
Naduh ba la thung ïa u Gambhir kum u head coach ha u Naitung jong u snem 2024, ka India ka la ïalehkai khyndai tylli ki jingïalehkai Test ha la ïing, hynrei ka la lah ban jop tang saw sien (ar sien pyrshah ïa ka Bangladesh bad ka West Indies). Ka India ka la shah rem haduh lai tylli ki jingïalehkai Test ha la ïing pyrshah ïa ka New Zealand ha u bnai Risaw-Naiwieng 2024 bad ar tylli ki Test pyrshah ïa ka South Africa ha u Naiwieng 2025.
Ka rekod jingshah rem jong ka India kaba kham hashwa ha ki jingïalehkai Test ka dei ha ka por ka jingshimti kum u coach da u John Wright. Ka India ka la ïalehkai 24 tylli ki Test ha la ïing hapoh ka jingïalam u Wright naduh u snem 2000 haduh 2005 bad ka la mad ïa ka jingshah rem ha ki saw tylli ki jingïakhun. U Greg Chappell, Ravi Shastri bad u Anil Kumble ki la shah rem mar shisien ha ka jingïalehkai Test ha la ïing, katba ka India ka la mad ïa ka jingshah rem ar siem ha la ïing ha ka Test hapoh ka jingïalam u Gary Kirsten, Duncan Fletcher bad u Rahul Dravid kum ki coach ïa kane ka kynhun ki rangïalehkai.
Naduh ba la thung ïa u Gambhir kum u coach, ka India kaba la bat ar sien ïa ka nam lahduh ha ka World Test Championship (WTC), ka la ïalehkai haduh 19 tylli ki jingïalehkai Test bad mad ïa ka jingshah rem hadien 10 tylli ki jingïakhun.
