Hyderabad, Naiwieng:
U Myntri ka sorkar pdeng u Bandi Sanjay Kumar u la tyrwa ïa ka pisa kaba T.10 lak na ka bynta ki shnong kiba hap ha Karimnagar Lok Sabha konstitwensi jong u lada ki jied ïa u kyrtong ba la kyrshan da ka BJP ha ka ilekshon Gram Panchayat ka ban long ha Telangana ha u bnai ban wan.
Da kaba kynnoh ba ki sorkar BRS bad Congress kiba mynshuwa ki shu “shukor” ïa ki briew ha ki por ba la dep da kaba kular pisa sha ki Panchayat kiba jied ïa ki nongkitkam jong ki da kawei ka sur, u la ong ia ki nongthep vote ba kim dei ban ngop ha kum kine ki buit ha kane ka kynti.
“Ki shnong ha Karimnagar, jied ïa u kyrtong ba kyrshan da ka BJP da kawei ka sur bad ïoh T.10 lak mardor na ka bynta ka roi ka par. Lada ka shnong jong phi ka jied ïa u President ba kyrshan da ka BJP da kawei ka sur ha Karimnagar Parliamentary konstitwensi, ngan bei tyngka beit beit sha ka 10 lak tyngka na ka bynta ka roi ka par jong kata ka shnong,” ong u Kumar ha ka rynsan X.
Kum u dkhot ka ïingdorbar, ka pisa jong ka MPLADS ka don bad u, la ong u Sanjay Kumar.
Ki paidbah ki la tip lypa kumno u la wanrah da ki klur tyngka lyngba ka Corporate Social Responsibility (CSR) bad pynlut ïa ki ha kaba kyntiew ïa ka pule puthi bad ka koit ka khiah.
Kum u Myntri ka sorkar pdeng, u pynthikna shuh shuh ïa ka pisa pdeng ban pynkhlaiñ ïa ka roi ka par jong ka Panchayat, u la ong.
Ka sorkar BRS kaba mynshwa ka la kular san lak sha ki Panchayat ha kaba ka ilekshon ka long da kawei ka sur bad jan 70 tylli ki shnong ha ka thaiñ Karimnagar Parliament ki la jied ïa ki kyrtong BRS da kawei ka sur da kaba shaniah ha ka jingpynthikna, u la ong.
Hynrei wat hadien san snem ruh ym shym la pyllait wat tang shi tyngka ruh da ka sorkar u KCR ha katei ka por, u la kynnoh.
“Mynshwa, ka sorkar Congress ruh ka la ai kijuh ki jingkular bad thok ïa ki briew ha ka kyrteng jong ka ilekshon kaba ïamynjur lang. Kiba shaniah ha ka Congress bad ka BRS ki la kut noh ha ka jingjynjar ha ka liang ka pisa tyngka. Baroh ar tylli ki seng mynta ki pynkhreh ban leh biang ïa kajuh ka jingleh thok. Nga kyntu ïa ki paidbah ka Karimnagar ba kim dei ban ngop ha ki kyntien jong ki,” la ong u Sanjay Kumar.
Tang ka BJP kaba wanrah ïa ka pisa kaba shisha, u la pynskhem.
Lada ki kyrtong ba la kyrshan da ka Congress ne ka BRS ki jop “da kaba bakla”, ka pisa thymmai kan ym wan, bad wat ka pisa pdeng ruh ka lah ban shah pynkylla lynti, u la ong, da kaba kyrpad ïa ki briew ba kim dei ban hap ha ki “jingpynbor” jong ki ar tylli ki seng.
Ka Telangana State Election Commission ha ka 25 tarik Naiwieng, ka la pynbna ïa ka por ba lai bynta na ka bynta ka ilekshon Gram Panchayat ha katei ka Jylla, ka ban long ha ka 11, 14, bad 17 tarik u Nohprah.
