Shillong, Naiwieng 27
U Bah Lahkmen Rymbui uba dei u Myntri ka tnad pule puthi ka Sorkar Jylla u la kyntait ban ai kano kano ka jingkular halor ka jingkyrpad ban pynjynsur ïa ka rta jong ki nonghikai SSA ha ka jylla.
Kane ka jingbym ai jingkular u Bah Lahkmen ka dei ha ka jingïakynduh bad ka kynhun jong ka Meghalaya State School Aided Association (MSSASA) kaba long ha ka sngi Palei ban ïakren ïa ki ar tylli ki mat ba kongsan, ka jingpynbeit ïa ka rta jong ki nonghikai SSA bad ka jingpynbeit ryntih ïa ki skul.
Ha kaba ïadei bad ka jingbuh kyndon ïa ka rta, u Bah Lahkmen u la ai khublei ïa ki nongtrei jong ka Sorkar, naduh ka tnad aiñ bad ka tnad pule puthi ba ha u snem 2022, ki la shim ïa ka rai ba na ka bynta ki nonghikai SSA ka jingbuh kyndon ka rta ka long 40+5 (45) bad ha kata ka por, ka Sorkar ruh ka la ai ïa ka lad kaba shisien ïa ka rta kiba la pyndep ïa ka TET.
Halor ka jingpynbeit thymmai ïa ki skul, u Myntri u la ong ka kynhun ka la kyrpad ruh ïa u ban peit ba ka jingpynbeit thymmai ïa ki skul dei ban leh shwa ka por sdang skul hynrei u la ong ba un pyrshang ban leh hynrei kam long kaba lah ïa u ban leh ha baroh kawei ka jylla.
U la pyntip ruh ba ka Sorkar ka la dep ban shim ïa ka rai ban pynbeit ryntih ïa ki skul, hynrei ka jingpyntreikam kan shim por.
U Bah Lahkmen u la kdew ruh ba ka tnad ka dang pynbeit ryntih ïa ka rukom ai jingïarap ne ka rukom siew tulop kaba la buh ryntih, ka ban ai jingshngaiñ ïa ki nonghikai bad ka jingshai halor ka tulop jong ki.
“Ka Khristmas bad u snem thymmai kin sa wan bad kaba kham kongsan ngin sa don ïa ka mang tyngka ha u bnai Rymphang lane ha kaba sdang jong u bnai Lber 2026. Kane kan shim por ruh ïa ki ophisar jong ngi jong ka tnad, ka directorate bad kumjuh ruh ïa ki DSEO bad ki SDSEO – kumta kam long kaba lah ïa nga ban kular ba ha kaba sdang jong u snem pule hynrei ka Sorkar ka la dep ban shim ïa ka sienjam kaba lah ban long ha kano kano ka por,” u la bynrap.
