Kane ka jingkylli ka longdoh longsnam bad ka hiar pateng la pateng ha ngi ki khun ki ksiew u Hynñiewtrep. Ka daw ba kongsan tam eh kaba ïa dei bad kane ka jingieit ka Meikha ka ñiakha ïa la ki khun kha, dei ba ki khun kha ki mih na u symbai ka doh ka snam jong ka Meikha. Ki khunkha ki long hi kum ki khun la jong ka Meikha.
Kane ka don jingïadei jong u symbai ba ioh na ka Meikha ka Niakha ka long ka snam ka ksuid jong ka Meikha kaba hiarpateng sha ki khunkha. Ka dei na u symbai keiñ namar na ka liang ka Meikha ka la ai sha ki khunkha.
Watla kim dei na kajuh ka jait ka kynja ruh, hynrei na ka liang ka Meikha ka dei ban ieit ïa la ka jong ka doh ka snam.
Uei keiñ u bym ieit ïa la ka doh ka snam la jong. Hynrei wat shi kur shijait ruh kim lah ban ai ka jingieit kumba ieit ka Meikha ïa ki khunkha. Namar shi kur shi jait makna kim don jingïadei ba jan na ka liang u symbai ba ki ioh. Namar dei u symbai uba don ka jingïadei kaba jan tam ha ka liang ka shongkha shongman. Ka jait ka long tang kum ka sopti Uniform kaba ki phong hapoh ki khynnah skul bad ki shipai.
Hynrei kim don jingïadei eiei ha ka doh ka snam namar ba ïapher u symbai. Hooid baroh ngi ki Khasi hynrei ngim don jingïadei ei ei na ka liang u symbai. Ngi shu sngew ïadei jan tang na ka jait ka kynja ba ngi shim jait na ka kmie.
C. B. Iawphniaw
