Khliehriat, Naiwieng 28
U Deputy Commissioner, East Jaiñtia Hills District u la pynmih ïa ka hukum ban thaw ïa ka komiti ban tohkit lang ne ka ‘Joint Inquiry Commi-ttee’ hadien ka jingmih khubor ba ki don katto-katne ngut ki khynnah pule jong ka Jawahar Navodaya Vidyalaya (JNV), Rymbai kiba la kem pang ha ka 22 tarik Naiwieng.
Ïa kane ka komiti yn ïalam da u Sub-Divisional Officer (SDO)-Sadar, East Jaiñtia Hills District, Manish Kumar, IAS bad ki dkhot ki kynthup – Food Safety Officer (FSO), East Jaiñtia Hills District, District Medical & Health Officer (DM& HO), East Jaiñtia Hills District, Sub-Divisional School Education Officer (SDSEO), East Jaiñtia Hills District bad District Child Protection Officer (DCPO), East Jaiñtia Hills District.
La bthah ïa ka komiti ba kan pynlong ïa ka jingtohkit kaba bniah halor ka daw jong ka jingjia ba la suba ba ka dei ka jingbam ba la sniew bad la bthah ruh ba kan ai ïa ka kaiphod kaba bniah kynthup ïa ki jinglap bad ki jingai jingmut sha u Deputy Commissioner, East Jaiñtia Hills District hapoh shi taïew naduh ka sngi ba la pynmih ïa ka hukum. Hashuwa kane, u DC u la pyntip ba ha ka 26 tarik Naiwieng, u Principal ka Jawahar Navodaya Vidyalaya (JNV), Rymbai, u Dr. Raj Kumar u la aiti ïa ka kaiphod sha u Deputy Commissioner-Cum-Chairman ka Vidyalaya Management Committee (VMC), East Jaiñtia Hills District, ha kaba u la batai bniah ïa ka jingjia ha katei ka jaka.
Ha ka kaiphod jong u, u Principal, JNV, Rymbai u la pyntip ba namar ka jingkylla kynsan jong ka suiñbneng, 17 ngut ki khynnah kynthei ki la ud jingshit bad baïongkhlieh, ha ka janmiet jong ka 22 tarik u Naiwieng la phah noh ïa kitei ki khynnah skul sha ïing na ka bynta ka jingsumar kaba kham bha jong ki kmie ki kpa bad ban ïada ïa kiwei pat ki khynnah skul na ka jingshah ktah ha ki jingpang ba ïoh na ki jingpang ba lah ban saphriang. U la pyntip ruh ba ha ka 23 tarik Naiwieng, katto-katne ki khynnah pule kiba la ujor ba ki don ka jingpang kpoh. U la pyntip shuh-shuh ba katei ka jaka pule ka don tang kawei ka ‘Staff Nurse’ bad duna bha ki lad jingsumar bad ïa ki khynnah la pynsah shipor ha ‘Common Hall’.
U Principal u la pyntip ruh ba ki don baroh 38 ngut ki khynnah skul, kham bun ki khynnah kynthei kiba pang bad naduh ka 25 tarik Naiwieng, na ki 38 ngut ki khynnah skul, 11 ngut na ki, ki la pyntip biang sha JNV hadien ba ki la koit.
Ym don uwei ruh u khynnah pule uba shah sumar ha ki hospital bad kiwei pat ki khynnah pule kiba dang shah sumar ruh ki la kham koit katkum ka jingïakren ba man ka por hapdeng ka JNV Staff bad ki khynnah pule, la pynpaw u Principal ha ka kaiphod jong u sha u Deputy Commissioner.
