Shillong, Naiwieng 28:
Ka North Eastern Hills University (NEHU) ka la pynkhlaiñ ïa ki lad jingïada ha ka jingshngaiñ hapoh ka phyllaw jong ka hadien ba arngut ki samla pule ki la shah tynrah da ka kali da u nongap pahara harud ka khyrdop kaba Ar.
Ka skulbah ka la bthah ban ym shah palat ïa ka 30 Km shi kynta ban ñiah sted ïa ki kali. La bthah ïa ki nongñiah ar shaka ba kin dei ban phong ïa ki helmet bad yn buh ruh ki jingmaham bad yn buh ruh da ki ‘rubberised speed breaker’.
Haba kren sha ki lad pathai khubor mynta ka sngi Thohdieng, u Chief Engineer, u Bah Lening Bareh u la ong ba ka CPWD ka dei kaba don jingkitkhlieh ban shna ïa ki “speed breaker” hynrei namar ka jingdonkam kyrkieh, ka skulbah ka shimti ïa ka kam dalade hi.
Katto katne ki projek surok kiba heh-kaba kot sha ka T. 5.53 klur-ki dang pyntreikam da ka CPWD, kynthup ïa ka surok na Gate No. 2 sha ka Gate No. 1 kaba dang tei thymmai.
U la ong ba ki nongpynïaid katei ka skul bah ka la nang pynbha shuh-shuh ruh ïa ka jingshngaiñ ha ka por mynmiet da kaba bujli ïa ki light surok ba rim da ki light solar.
“Ka skul ka siew T. 50-60 lak shi bnai ka bai bill light. Ka jingpyndonkam da ki solar light kan pynduna ïa ka jinglut jingsep, bad mynta ka jingshai hapoh ka ‘campus’ ka nang bha shibun,” ong u Chief Engineer.
Ka NEHU ka ong ba kine ki sienjam ki thmu ban pynthikna ïa ka jinglong jingman kaba kham shngaiñ na ka bynta ki samla pule bad ki nongleit nongwan ha kylleng ka jaka pule.
