Shillong, Naiwieng 28
U MLA ka Mawsynram Konstitwensi, u Bah Olan Sing Suiñ u la pyntip ba ha u snem ban wan lah ban sdang pyntrei noh ïa ka surok na Weiloi sha Mawsynram ter-ter.
U Bah Olan Sing Suiñ u la pynpaw ruh ka jingsngewkhia, ba na ka por sha ka por ki sengbhalang ki ju mih ban ïakhih halor ka jingsniew palat ka surok ha ki thaiñ Mawsynram.
“Ka surok na Weiloi shaduh sha Phlangwanbroi yn sa lah ban pyntrei noh, kumjuh ruh ka ban bteng na Phlangwanbroi kaba ïaid lyngba na Umpung shaduh Ranikor kaba dei na kawei pat ka skhim, kaba la dep ban wan jurip, kane ruh ngi kyrmen ba yn sa pyntrei noh ha u snem ban wan,” u la ong.
Haba ïakren bad u Nongsaiñ Hima ha ka 28 Tarik u Naiwieng 2025, u MLA u la ong “Nga sngewkhia bha halor ka jingwan ki sengbhalang na ka por sha ka por bad ban ïakhih halor ka jingsniew palat ka surok ha ki thaiñ Mawsynram, kaba dei kawei ka thaiñ kaba la rim bha hynrei ka surok pat ka long kaba sniew tasam”.
“Ka Sorkar ka la shah shkor bad nga ruh nga la ïakren bha, khamtam bad u Symbud Myntri Rangbah ka Jylla ba khmih ïa ka tnad surok, u Bah Prestone Tynsong bad uba la kitkhia bha halor kane ka kam, ba ka thaiñ Mawsynram ka la dei ban ïoh noh ïa ka surok ba thymmai,” la ong u Bah Suiñ.
Nalor kata, u la kyrmen ruh ba kane ka surok na Weiloi- Mawsynram ter-ter shaduh sha Ranikor, ba lada kam dei mynta u snem ruh ha u snem ban wan yn sa sdang noh ban pyntrei.
Haba kylli u Bah Suiñ u ong “Ka jingsniew bha ka surok ha ki thaiñ Mawsynram kadei namar ba ngim ju shna pynbha ïa ka, hynrei la shu syrdep malu mala tang ïa ki jaka ba sniew. Ka jingjur slap ha ki thaiñ Mawsynram ruh ka la pynlong ba ka surok ka sniew kloi noh haba la shu syrdep malu mala”.
“Mynta ngi la leh da ki skhim kiba bha bad kyrmen ba kane ka surok ka ban sa shna kan long kaba bha bad kan neh. Shisien ba la bha ka surok nga tharai ka jingroi jingpar ka Konstitwensi kan dangphuh dangphieng bad kan sa wanrah shuh-shuh ïa ka jingkylla,” la bynrap u Bah Suiñ.
