Shillong, Naiwieng 28
Ka Mawlai Mawdatbaki ka la long ka lahduh ha ka Mawlai Cup 2025 ba la pynïaid da ka Red Mark Football Club, hadien ba ka la lah ban pynliem noh ïa ka Mawlai Phudmuri lyngba ka tie breaker da 6 la 5 kol ha ka jingïakhun final kaba la long ha ka 28 tarik u Naiwieng 2025 ha Madan Heh Mini Stadium kaba ha Mawlai Phudmuri.
Ha kane ka sngi la ïadon lang u Bah Freddystar Thabah, General Secretary ka Mawlai Block Congress Committee kum u kongsan ha ryngkat ka jingïadonlang u Bah Samuel Biang, Chairman ka Seng Samla Mawlai Pyllun, kumjuh u Bah Edil Majaw Secretary ka Mawlai Block Congress Committee, Bah K. Lyngdoh, Organising Secretary ka Mawlai Block Congress Committee, Bah Anjelus Biang, President ka Red Mark Football Club bad kiwei-kiwei.
Ha kane ka jingïakhun baroh ar ki kynhun ki la ïakhun tyngeh naduh kaba sdang ha kaba ki la ïathep mar 2 kol haduh kaba kut ki 90 minit bad ha ka extra time ki la ïathep biang sa mar shi kol. Dei ka jingïashut tie breaker ba ka Mawdatbaki ka la jop da 6 la 5 kol ïa ka Phudmuri.
Lyngba kane ka jingjop ka Mawdatbaki ka la ïohpdiang ka khusnam pisa kaba 31 hajar tyngka, katba ka Phudmuri ka la ïoh 21 hajar tyngka lem bad ki trophy. Ïa ka nam Best Player jong ka Mawlai Cup 2025 la ïoh da u Damonlang Pathaw na ka Mawdatbaki.
