Shillong, Naiwieng 28
Ki pulit ki la ïoh ban kurup noh ïa u drok ba la suba jur u heroin na kawei ka kali Maruti Alto-K10 na ka thaiñ Lumshnong ha East Jaiñtia Hills.
Katkum ka khubor na ki pulit la ong ba ha ka 26 tarik mynta u bnai, ha ka por kumba 3.30 janmiet, hadien ka jingïoh ïa ka jingtip kaba bniah, ki pulit ki la bat noh ïa kawei ka kali Maruti Alto-K10, kaba don ïa u Registration Number AS01-MA-8679, ïa kaba la ñiah da u Tafajul Hussain Bharbhuiya (31 snem) ryngkat bad uwei u briew ba la suba u nongkhaïi drok, ïa uba la tip kyrteng kum u Bhuban Deb (40 snem) ha Lumshnong.
La ong ba na kane ka kali, ki pulit ki la ïoh ban kurup ïa ki lai tylli ki song plastik ha kaba la thep ïa u drok ba don ka jingkhia kaba 36.84 gram, ba la suba ba u lah ban dei u heroin.
