Colombo, Naiwieng:
Ka Sri Lanka ha ka Sngi Thohdieng ka la khang khyrdep lut ia baroh ki skul bad ki ophis treikam hadien ba ka jingiap jong ki briew na ki jingjia shlei um bad jingtwa khyndew, ka la kiew sha ka 56 ngut bad kumba 600 tylli ki iing briew ki la julor.
Ka Sri Lanka ka la sdang ban ïakhun pyrshah ïa ki jingeh namar ka jingsniew ka suiñbneng ha ka taiew ba la dep bad ka jinglong jingman ka la nang sniew ha ka Sngi Palei namar u slap uba jur bha, uba la wanrah ia ki jingshlei um ba la tap ia ki ïing- ki sem, ki lyngkha bad ki surok bad kaba la wanrah pat ruh ïa ka jingtwa khyndew ha kylleng jong ka ri.
Palat 25ngut ki briew, ki la ïap ha ka Sngi Palei, na ka jingtwa khyndew ha ki thaiñ lum pdeng jong ki jaka thung sla-sha jong ka Badulla bad Nuwara Eliya, kaba jngai kumba 300 kilomitar (186 mail) shaphang mihngi jong ka nongbah Colombo. Sa 21 ngut ki briew ki la jah rngai bad 14 ngut ki la mynsaw ha ki thaiñ Badulla bad Nuwara Eliya, la iathuh ka kaiphod jong ka sorkar ha ka Sngi Thohdieng.
Don ruh sa kiwei pat kiba ngat bad kiba la khlad ha ka jingtwa khyndew ha ki bynta bapher jong katei ka ri.
Katba ka jinglong ka suinbneng ka la nang sniew, ka sorkar ka la pynbna ban khang noh shwa shipor ia baroh ki ophis sorkar bad ki jaka pule ha ka Sngi Thohdieng, naka bynta ka jingshngaiñ jong ki nongleit nongwan bad ki khynnah pule.
Namar ka jingjur jong u slap, bunsien ki jaka buh um bad ki wah ki la shlei lut, kaba la khanglad pat sa ia ki surok bad ki lynti- ki synkien. Kumta ruh ki bor pyniaid ki la pynsangeh noh ia ki rel kit briew bad la khang ia ki surok ha kiba bun ki bynta jong ka ri hadien ba ki maw, ki dewbilat bad ki dieng ki la hap ha ki surok bad ki lynti rel, kiba la shah rong noh ruh ha ki katto katne ki jaka.
Ka tnat pathai khubor jong katei ka nongbah, ka la pyni ïa ka liengsuiñ jong ki shipai suiñ kaba la pyllait im ïa 3 ngut ki briew kiba sahkut ha tnum jong kawei ka ïing kaba la shah tap da ka um. Katba, ki shipai duriaw bad ki pulit pat, ki la pyndonkam da ki lieng ban leit kit bad pyllait im ïa ki nongshong shnong kiba bun kiba dei na kitei ki shnong ba shlei um bad ki shnong ba marjan.
Ki dur ha ka Sngi Palei, ki pyni ruh ia kawei ka kali kaba la shah rong noh ha ka um hajan ka thaiñ Ampara, kaba don sha ka phang Mihngi jong katei ka ri, ha kaba 3 ngut pat ki la duh ei noh ia ka jingim ha katei ka jingjia.
