Alaska, Naiwieng:
Katkum ki khubor, la ong ba u jumai uba la poi kumba 6.0 Magnitude ka jingkhlaiñ, u la pynkhynñiuh ia ki bynta jong ka Anchorage Metropolitan ha ka step Sngi Palei.
Utei u jumai u la khynñiuh ha ka por kumba 8:11 Mynstep, ha ka jing jylliew kaba 69 Kilometer lane kumba 43 Mile. Ka phang pdeng jong utei u jumai ka long kumba 12 Kilometer na ka phang West- Northwest jong ka Susitna jong ka nongbah Alaska, ka thaiñ kaba don kumta 67Mile na ka phang Northwest jong katei ka nongbah. Tad haduh ba la ioh lum ia kane ka khubor, ym pat shym la ioh jingtip ban don kiba ngat ne shah ktah ha utei u jumai ha katei ka step.
Ki heh ka Municipal ki dang wad bniah ban lap ia kino- kino ki jingjia kiba shah ktah na utei u jumai, la ka long ki jing julor ne jing orpait ki iing- ki sem, ne kino- kino ki jingtwa kiba iadei bad utei u jumai ha katei ka step.
Kaba khlem ioh ban pynbeit ne pynkhreh lypa, ka long ba kam shym la don kano- kano ka dak jong ka jingwan ka er’iong ne ki jingat phyllung ki um, hynrei utei u jumai u la shu wan kynsan kynsan khlem kino- kino ki dak kumba ju long ka rukom.
Ka Alaska ka dei ka nongbah kaba don ka jingkhynñiuh jumai kaba jur bha ha U.S. bad kawei na ki jaka kaba don ka jingkhynñiuh jumai kaba jur tam ha ka pyrthei, ong ka USGS. Ka jylla ka mad ia ka jingkhynñiuh jumai kaba 7 magnitude la jan man la u snem.
Hynrei, la ong ba kane ka jingkhynñiuh u jumai ha ka Sngi Palei ka dei kaba heh tam kaba la jia ha ka bynta ba Shatei Pdeng jong ka Alaska naduh u snem 2021.
