Shillong, Naiwieng 28
Ka Shillong Lajong FC lem bad ka Laitkyrhong SC, ki la ïoh ban khur ïa ki nam jop ki jong ki, ha ka lympung ïalehkai ka Shillong Champions Cup, ka Shillong Sports Association, ha ki jingïakhun kiba la long hynne ka sngi Thohdieng jong ka taïew, ha SSA Stadium, First Ground, Polo.
Ha ka jingïalehkai ba nyngkong jong ka sngi, ka Shillong Lajong FC, kaba dei ruh ka kynhun kaba wan ba-ar (runners up) ha ka SPL bad lahduh ka Super Cup, ka la lah ba kan pynliem da 8-0 kol pyrshah ïa ka kynhun ïalehkai jong ka Mawlynrei, ha kaba ha kane ka jingïakhun u Riborlang L Lyngkhoi, u la ïoh ba un thep lai kol ne ka hat trick kaba ar ka jong u ha kane ka lympung ïakhun.
Katba ka kynhun ïalehkai jong ka Laitkyrhong ka la lah ba kan pynliem ïa ka Mawkriah West da 5-2 kol.
Haba phai sha ka jingjop ka Lajong, u Riborlang u la ïoh ban thep ïa ka hat trick kaba ar ka jong u ha ka minit kaba ba 37′, 44′, 55′ bad ïa ki kol kiba sah la thep da u Emanbha Marbaniang (13′, 61′), Deibormame Tongper (65′, 89′) bad Babysunday Marngar 73′.
Hynrei ha ka jingïakhun kaba ar jong ka sngi, ka kylla step ka kham ïa biang bor bad kaba kham ïakhaid bha katta ka rukom ïalehkai hapdeng ka Laitkyrhong bad ka Mawkriah West.
Ha lyndet kane ka jingjop ka Laitkyrhong ka la wan hadien ba u Wallamsuk Nongkhlaw u la lam khmat ïa ka kynhun ban thep artylli ki kol ha ka minit kaba 24 bad kaba 62, bynrap biang sa da ki ar kol ba la thep da u Learningstar Warlarpih ha ka minit ba 30 bad kaba 84 bad sa shi kol la thep da u Dibinroy Nongspung ha ka minit kaba 54.
Ïa ki artylli ki kol; naka bynta ka Mawkriah West la thep ïa ki lyngba u Dibarson Kharbudnah (11′) bad Enestar Malngiang (63′).
Kumta tad haduh ba kut jong ka jingïakhun kaba la long hynne ka sngi, na ka Group B, ka Shillong Lajong ka la ïoh ba kan khur 6 poiñ, bud pat sa ka Nongkseh bad ka Laitkyrhong kiba la ïoh ban khur mar 3 poiñ, katba ka Mawlynrei bad Mawkriah kim pat shym la ïoh ban khur poiñ satia.
Lashai ka sngi, kan don tang kawei ka jingïakhun kaba dei naka bynta ka Group A ha kaba ka Meghalaya Police FT kan mih madan ban ïakhun pyrshah ïa ka Mawkasiang ka ban long ha ka por 2:30 mynsngi.
