Bengaluru, Naiwieng:
U Myntri Rangbah ka Karnataka, u Siddaramaiah, u la ong ha ka sngi Balang ba ka jingthmu jong ka Riti Synshar, ka jinglaitluid, ka jingïaryngkat, bad ka jinglaitluid, kam shym la urlong wat hadien 79 snem ba la ïoh ïa ka jinglaitluid.
“Da ki katto katne ki jingthmu ba la buh kyrpang ki bym ailad ban pynduhjait ïa ka rukom kheiñ jaitbynriew, ngim lah ban shakri ïa ka jingthmu jong ka Riti Synshar,” u la ong haba kren ha ka prokram ba la pynlong ban rakhe ïa ka Constitution Day.
“Ka imlang sahlang jong ngi ka long kaba kyrpang. Ha kum kine ki jinglong jingman, la lah ban long tang ïa u Dr BR Ambedkar ban thoh ïa ka Riti Synshar. Hynrei bun kim pdiang ïa kane bad ki kynnoh ba ka bynta jong u Ambedkar ka kham duna bad kiwei ki don ka bynta kaba kham heh ha kaba shna ïa ka Riti Synshar. Kane kam long kaba dei.
Ki don 6 ngut ki dkhot ha ka Constitution Draft Committee, katba arngut na kitei ki bym koit bym khiah bad arngut kim don ha Delhi.
Ka jingkitkhlieh ka la kham shong ha u Dr Ambedkar. Ym don uwei pat u briew uba lah ban sngewthuh ïa ka imlang sahlang kaba pynshong nongrim ha ka jaitbynriew kum ma u”, la ong u Siddaramaiah.
Shuh shuh, u Myntri Rangbah u la ong ba shwa ban ïoh ïa ka jinglaitluid, ka la don ka Riti synshar kaba khlem thoh kaba ki khot ka Manusmriti.
“Ki Manuvadi kim pdiang ïa u Dr Ambedkar kum u Kpa jong ka Riti Synshar ka Ri India. Phi hap ban ithuh ïa kum kine ki briew ha ka imlang sahlang”, la ong u Siddaramaia.
“Ki dkhot ka BJP ki ong ba ïa ka Reservation la dei ban pynduh noh hadien 10 snem, hato ka mut ba ngi la ïoh ïa ka jingïaryngkat ha ki 10 snem? Ngim pat ïoh ïa ka jingïaryngkat wat hadien 79 snem”, la bynrap biang u Myntri Rangbah.
U Siddaramaiah u la ong ruh ba ka rukom kheiñ jaitbynriew ka la long kaba sahkut.
“Kan don katto katne ka jingkhih tang lada ki baduk bad ki Dalit ki long kiba la pynkup bor ha ka imlang sahlang bad ka ïoh ka kot. Ngim pat lah ban ïoh ïa ka, namar ba ka jingsngew jaitbynriew ka dang don. Ngi la ïoh ïa ka jinglaitluid ha ka saiñ pyrthei, hynrei ym ka jinglaitluid ha ka imlang sahlang bad ka ïoh ka kot,” u la ong.
“Nga sngewkmen ba nga la sdang ïa ka Anna Bhagya khnang ba ki baduk kin ïoh bam, bad kim dei ban ïeng hakhmat jongno jongno ruh. Da kane, ka jingthmu jong ka Riti synshar ka la pyndep haduh katno katno,” u la ong bad bynrap ba ka jingthmu jong ki skhim ai jingkular jong ka sorkar jong u ka long ban pynkupbor ïa ki briew ha ka liang ka ïoh ka kot.
