Shillong, Naiwieng 28
Ka Joint Action Committee Muster Roll Workers Union ha ka 28 tarik u Naiwieng 2025, ki la leit buh da ka dorkhas sha u Myntri Rangbah ka Jylla, u Conrad Sangma ban pynsngew ïa ki mat jingdawa kiba ki la rai ha ka jingïalang ha ka 22 tarik mynta u bnai.
Ïa kane ka jingdawa, ka JACMRWU ka la aipor hapoh ka 10 tarik u Nohprah 2025, ba ka Sorkar kan khot ïakren ïa ki nongïalam ka seng, da kaba byrngem ruh ba lada kim urlong katkum ka jingdawa kin sa ap miet Khrismas ha Secretariat.
Haba kren sha ki lad pathai khubor u Bah Bympherlang Lyndem, General Secretary Joint Action Committee Muster Roll Worker Union u ong “Mynta ka sngi kam dei ka sngi ban wan ïakhih ha Secretariat hynrei ngi wan ban buh ïa ki jingdawa kaei kaba ka seng ka la rai ha ka jingïalang ba dangshu dep shen, ba la pynlong ha madan Malki”.
“Ngi kyrmen ba kaei ba ka seng ka la buh, u Myntri Rangbah un sa pule bad shen un sa khot ïakren ruh. Baroh ki nongtrei Muster Roll ki kyrmen ba u Myntri un sngap ïa ki jingdawa jong ngi bad ba un khot noh sha ka miej jingïakren hashwa ka 10 tarik,” la ong u Bah Bympherlang.
Lah ban kdew, ki jingdawa jong ki nongtrei Muster Roll ki long ba ka Sorkar ka dei ban siew noh ïa ka ‘Floor Rate’ ka bym pat shym la siew naduh u bnai Risaw 2023-2024.
Haba ïadei bad ka rta shongthait, ki nongtrei Muster Roll ki la dawa ba kam dei ban palat ïa ka 65 snem, namar ki don ki tnad treikam kiba pynkheiñ ïa ka hukum ba la soi da u Lat ka Jylla ha u snem 2009, nangta ka Employee Provident Fund (EPF) kaba ki nongtrei Muster Roll kin ïoh jingmyntoi haba ki la shongthait na ka kam.
Kumta u Bah Bympherlang u la ong ba lada ka Sorkar kam pynurlong ïa kine ki mat jingdawa, baroh ki nongtrei Muster Roll ki la rai ban shong ap miet Khrismas ha Secretariat. “Ngi kyrmen ba u Myntri Rangbah un sngap ïa kine ki jingdawa ka seng,” u la bynrap.
