Shillong, Naiwieng 28
U Myntri Rangbah ka Jylla Conrad K Sangma ha ka sngi Thohdieng u la pynbna ba un pyllait noh ïa ka installment ka-ba ar jong ka post metric scholarship, da ka jingthmu ba kan ïarap ïa ki samla shwa jong ka jinglehkmen Christmas.
“Nga kwah ban ai tang ka khubor kaba bha sha phi ba lashai ka sngi, ka 29 tarik Naiwieng, ngan pyllait noh ïa ka installment kaba ar jong ka post-matric scholarship,” la ong u Conrad bad bynrap ba hadien kane, kan shimpor ruh kumba 2 ne 3 sngi ha ki sngi longtrei ba kane ka pisa kan paw ha ka account jong ki samla pule.
U Conrad u la ban biang halor ka jingthmu ka jong u ban kyrshan ïa ki samla pule, da kaba ong,
“Kumba la kular sha phi baroh, mynta u snem ngan shimkhia bad ban pynthikna ba ka pisa scholarship jong phi, yn pyllait noh shwa jong ka jinglehkmen Christmas bad kumta ngan leh ïa kata.”
Katkum ka jingong jong u, palat 70,000 ngut ki samla pule kin ïoh ïa kane ka scholarship kaba jan kot sha ka T.130 klur.
“Nga long thikna ba kane kan ïarap bha ïa ki samla pule ha kiba bun ki liang,” la ong u Conrad bad ha kaba u la ai ka jingkitbok kit rwiang ruh ïa baroh ki samla na ka bynta ka lawei ka jong ki.
