Mawkyrwat, Naiwieng 28
Ka Mawlangwir Sports Club ha ka 27 tarik u Naiwieng 2025 ka la ïoh ban plie pyrda ïa ka lympung ïalehkai phutbol kaba tip kum ka 2nd Rowell Lyngdoh Memorial Football Tournament 2025 – 2026 ha madan, Rowell Lyngdoh Stadium, Saitsnad Mawlangwir, South West Khasi Hills District.
Ha kane ka sngi sdang ka jingïalehkai ka la long hapdeng ka Wahkaji Sports & Cultural Club pyrshah ïa ka Mawten Sports Club ha kaba ka Wahkaji ka la jop da 1-0 ïa ka Mawten bad ïa kane ka kol la thep da u Riskhem Wanniang ha ka minit kaba 11 jong ka kylla step.
Ïa kane ka lympung la wan ban plie pyrda da u Bah Renikton Lyngdoh Tongkhar, MLA jong ka Mawkyrwat Constituency kum u kongsan bad kum ka dak ban plie pyrda ïa kane ka lympung ïalehkai ula kynjat ruh ïa ka bol ha madan. Haba pynbud ïa ka jingkren u la ai jingïaroh ïa u (L) Rowell Lyngdoh uba la long u nongprad lynti ïa kiba bun ki kam hapoh jong ka dong ka thaiñ bad kumjuh ruh uba la pyni da ka lynti kaba bha kum u nongmihkhmat ha kaba u la long ka nuksa ba bha ïa kane ka pateng ba mynta.
Ha ka juh ka por u la ai mynsiem ruh ïa kiba ha ïing jong u ba kin nang ïai pynlong ïa kum kine ki jait jingïalehkai kiba long kum ka dak ban pynsah nam ïa ka jinglong jingim jong u pateng la pateng. Ym tang kata u la kular ruh ba na ka bynta ban pynsah nam ïa u (L) Rowell Lyngdoh u la bhah ne mang kumba T. 4 lak ei-ei bad ïa kane un sa mang pisa kyrpang ha ka mang tyngka jong u snem 2026-2027 na ka SRWP jong ka MLA Scheme da kaba don ka jingïasngewthuh jingmut bad kiba ha ïing jong u.
Haba kren na ka bynta ki ‘rangïalehkai, u Bah Renikton Lyngdoh Tongkhar u la ai mynsiem ïa ki samla ïalehkai, ba haba ki kwah ban kiew ha kane ka kam bad don jingthmu ruh ban ïoh ki kam ki jam lyngba ki jingïalehkai ki dei ban long borabor ki samla kiba minot, kiba pynmlien ha ki jingkilanmet, kiba kiar na ki jingbam kiba pyntroiñ ïa ka met bad kiar ruh na kiwei de ki kam ki bym ïa hap ha ka bynta jong ki nongïalehkai sports. U la ai mynsiem ruh haba ki ïalehkai ha madan ki dei ban pyni shisha ïa ka sap ba ki ki don ym ban shu ïalehkai tang dep rukom ne ïalehkai pynmynsaw briew hynrei ïalehkai da ka mynsiem jong ka jingkyrmen ban poi sha ka thong.
Ha kane ka sngi plie pyrda ïa ka 2nd Rowell Lyngdoh Memorial Football Tournament 2025 – 2026 la sakhi lang naduh kiba ha ïing ha sem jong u (L) Rowell Lyngdoh uba dei u MLA barim jong ka Mawkyrwat Constituency bad kum u Symbud Myntri Rangbah barim jong ka Jylla Meghalaya ba kynthup ïa u bah Mebandonnam Saiborn uba la ai jingkren lyngkot lem bad kiwei de kiba kynthup ruh ïa ki nongkitkam jong ka Mawlangwir Sports Club, ki paidbah riew ieit phutbol naduh ki rangbah, ki samla bad ki hep kiba rit.
