Khliehriat, Naiwieng 28
Ka ophis District Sports Officer, East Jaintia Hills ryngkat ka jingïatreilang ka bor synshar District, lyngba ka District Sports Promotion Society ha ka 27 tarik Naiwieng ka la pynkup burom ïa baroh ki nongïalehkai kiba la ïoh ïa ka State Level Medal Achievers jong ka East Jaintia Hills District ha ka Inter School Athletics Meet 2025, ha ka prokram kaba la pynlong ha Conference Hall, ka ophis u Deputy Commissioner, East Jaintia Hills District, Khliehriat.
Ïa kane ka sngi pynkup burom la pyndep da ka MLA ka Sutnga- Saipung ka Kong Santa Mary Shylla ha ka jingïadonlang u Deputy Commissioner, u Shivansh Awasthi, IAS, Sub-Divisional Officer (SDO)-Sadar, Manish Kumar, IAS, District Sports Ophisar, ka Kong S.M. Rapsang, ki dkhot ka East Jaiñtia Hills District Sports Association, ki Athletic Coach, ki nongïalehkai bad kiwei-kiwei.
Ka MLA ka Sutnga-Saipung ka Kong Santa Mary Shylla ha ka jingkren ka la ai khublei ïa baroh ki nongïalehkai kiba la wanrah ïa ka burom sha ka District bad ka la ong ba ka jingai khublei ka long kum ka jingai mynsiem ïa ki samla ban ïaid shakhmat bad ban ïaleh ban long kiba tbit, kala pynpaw shuh-shuh ba ki bor synshar District bad ki nongmihkhmat na ka thaiñ ki trei shitom ban pynbha shuh-shuh ïa ki jaka ïalehkai ha ka distrik khnang ba ki samla kin nang pynjanai shuh-shuh ïa la ka sap ka jong ki.
Shuh-shuh, ka la pynpaw ruh ïa ka jingsngewkhia halor ka jingkiew jong ki jingeh ha ka imlang sahlang kiba ktah ïa ki samla khamtam eh ïa ka jingdih buaid bad ka la kyntu ïa ka jingïalang, khamtam ïa ki nongïalehkai ban pynshlur ïa ki paralok jong ki hapoh ka imlang sahlang ban ïashim bynta ha ki kam kiba tei kum ki jingïalehkai.
Kala pyntip ba kala don ka jingthmu ban wanrah ïa ka Swimming Pool hapoh ka District bad ka pynpaw ruh ka jingkmen ba la pyndep ïa ka madan Squash Court kaba don ha Khliehriat kaba la ïasoi mynta ka sngi ïa ka MoU ban aiti sha ka East Jaiñtia Hills District Sports Association.
Ka Kong Shylla ka la kyntu ruh ïa ka synjuk ïalehkai jong ka District ban pynlong ïa ki prokram pynsngewthuh ha ki shnong ki thaw ban pynthikna ba ki paidbah kin ïoh jingtip shaphang ki lad ïalehkai kiba don ha ka District bad kala pynpaw ba kum kine ki jingthmu ki long kiba donkam bha ha kaba ïada na ka jingshah pynngop ha ki samla kum u drok bad ban ïarap ïa ki ban sngewthuh ïa ki jingjop jong kiwei pat ki nongïalehkai trai ri.
Ha kajuh ka por, u Deputy Commissioner, East Jaiñtia Hills District, u Shivansh Awasthi, IAS ula pynbna ba ka district ka thmu ban pynlong ïa ka jingïalehkai kaba nyngkong ka East Jaiñtia Hills District Games hapoh District Games, kaba la buh por lypa ha u bnai Kyllalyngkot 2026 ne Rymphang 2026 ha kaba la khmih lynti ba kane ka jingïalehkai kan don kumba 12 tylli ki jait jingïalehkai bad kan long kum ka rynsan na ka bynta ka jingpynkhreh iaka National Games 2027 ka ban long ha Meghalaya.
Hadien ka jingïalang la pynkup burom da ka song pisa sha baroh ki nongïalehkai bad ïa ki Athletics Coach na ka district.
