Khliehriat, Naiwieng 28
Ka Jaiñtia National Council (JNC) ka la ujor pyrshah ïa ka jingthmu jong ka Shree Cement Limited ban seng karkhana dewbilat ha ka shnong Daistong, East Jaiñtia Hills da kaba kdew halor ka jingkynnoh ai jaka be-aiñ da uwei u trai jaka sha u bar jylla uba kyrteng u Bharat Sharma.
“Kane ka jingïadie-ïathied jaka ka pynkheiñ ïa ka Meghalaya Transfer of Land Regulation Act, 1971, bad ka Jaiñtia Hills Autonomous District Council (ADC) Rules,” ong u President ka JNC, u Bah Sambormi Lyngdoh.
Ka kaiphod Environmental Impact Assessment (EIA) kam don satia ïa ki kot ki sla ba kongsan, kynthup ïa ka jingmynjur ka Jaiñtia Hills Autonomous District Council (JHADC), ki kot ki sla jong ka jingpynkylla kaba pynlong ïa ka jingïateh kular halor ka jaka kaba khlem jingmyntoi naduh kaba sdang, u la ong.
Ka JNC ha ka 28 tarik Naiwieng ka la leit ruh ban buh da ka jingujor halor kane hakhmat u Deputy Commissioner ka East Jaiñtia Hills, u Shivansh Awasthi, da kaba maham ruh ban pynlong da ka jingïakhih kaba tyngeh lada thmu ban pynïaid shakhmat ïa kane ka projek khlem da pynbeit ïa kine ki jingeh.
Ka JNC ka la dawa ruh ba dei ban pynsangeh ïa ka ‘Public Hearing’ kaba la buh ban pynlong ha ka 19 tarik Nohprah 2025, da kaba kdew ïa ka jingpynkheiñ ïa ka Meghalaya State Investment Promotion Facilitation Act (MIIPA) 2024 bad ka jingpynbna ka EIA ha u 2006.
Ka MSPCB kam shym la leh hok ïa ka kamram jong ka da kaba pynïaid shakhmat khlem da bishar ïa ka jinglong trai jaka, kaba la aibor pynban ïa ki kompeni ban jam palat ïa u pud khlem da burom shuh ïa ka hok jong ki trai shnong ‘riewlum katkum ka Article 371B jong ka Riti Synshar Ri, ong u Bah Sambormi.
“Ngi dawa ban pynlong mardor ïa ka jingtohkit halor ka jinglong trai jaka, ka jingshisha jong ki kot ki sla, bad ki jingbthah jong ka MSPCB bad ka State Environment Impact Assessment Authority (SEIAA) ban pynsangeh ïa ka ‘Public Hearing’,” u la bynrap.
Nalorkata, ka JNC ka la kyntait ruh ïa ki jingkular ai kam ai jam jong ka Shree Cement Limited da kaba kdew halor ka jingduna ha ka jingdon ïa ki briew kiba tbit ha ka kam bad ka jingbym don ïa ki ‘Plan’ na ka bynta ban ai jinghikai.
Ha kane ka jingïakynduh, u Deputy Commissioner u la pyntikna ba un sa shimkhia halor kane ka kam da kaba ïakren bad ki bor kiba halor.
