Shillong, Naiwieng 28
Ar ngut ki briew ki la shah kem noh katba u nongñiah jong ka kali pat u la lait phet hadien ba ki la phet mar ïa ïohi ïa ki pulit kiba ïaid pahara.
Katkum ka khubor na ki pulit la ong ba ha ka miet jong ka 25 tarik mynta u bnai, kawei ka kali Maruti Wagon-R kaba don ïa u Registration Number ML12-1076 kaba la ñiah da u Ismail Sangma, ryngkat bad ki ar ngut kiba shong hapoh kali, kata u Jeleush A Sangma (25 snem) bad u Kron M Marak (43 snem), ki la pynher sted ïa ka kali hadien ba ki la ïohi ïa ki pulit kiba pahara ha ka thaiñ Wa’trebok ha surok NH-127B ha East Garo Hills.
Hynrei la ong ba kham hadien na ka liang jong ki pulit ki la ïoh ban bat noh ïa kane ka kali bad ban kurup ïa i khun masi (calf), kaba la ïoh jingtip ba dei ba la tuh na ka thaiñ Samanda ha East Garo Hills da ki lai ngut.
Na ka liang jong ki pulit ki la ïoh ban kem noh ïa ki ar ngut, katba u nongñiah jong katei ka kali u la ïoh ban phet krad.
