Shillong, Naiwieng 28
Ka jingshah tuh jong ki kali, ka jingshah prong tuh jong ki ïing ka la bteng biang ha ki katto katne ki bynta bad ïa kane lah ban sakhi na ki jingjia ba dang shen.
Katkum ka khubor na ki pulit la ong ba u Bah Shemphang Warjri u la ai ka jingujor ba ha ka miet jong ka 25 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u Registration Number ML05-AB-4430 na ka thaiñ Demthring Block-III, Shillong.
Ha kawei pat ka khubor, u S Apin Singh u la ai ka jingujor ba ha ka 26 tarik mynta u bnai, ki runar bym lah ban ithuh, ki la prong tuh hapoh ka ïing jong u, kaba don ha Madanrting Block-F, Shillong bad ban tuh ïa kawei ka Laptop.
Na ka liang jong ka Saini R Sangma ruh ka la ai ka jingujor ba ha ka 25 tarik mynta u bnai, ki runar bym lah ban ithuh ki la tuh ïa ka kali Bolero pick-up ka jong ka, kaba don ïa u Registration Number ML13-A-6439 na ka jaka sah jong ka, kaba don ha Nongchram ha East Garo Hills.
Ha kawei pat ka khubor u Bah Kyntu Shaphrang Sayoo, Sub-Contractor jong ka Dhar Construction Company hapoh ka MeECL (RDSS scheme) u la ai ka jingujor ba ha ka miet jong ka 24 tarik mynta u bnai, ki runar bym lah ban ithuh, ki la tuh ïa ki waiar cable kiba shongdor haduh kumba T.5,42,800/- na ka jaka trei kaba don ha shnong Kyan Mymynsar Thlongmoo bad Ïooksi Iapkhla ha West Jaiñtia Hills.
