Shillong, Naiwieng 28
Ka Deputy Commissioner (DC) East Khasi Hills kala pynmih ïa ka jingpynbna paidbah ba yn khang ïa ka surok na Lad 5 Mer shaduh Air Force Station Gate, Shillong Peak naduh ka 29 tarik Naiwieng haduh 1 tarik Nohprah.
Kane ka jingkhang ïa ka surok kan treikam naduh ka por 10 baje mynmiet haduh ka por 6 baje mynstep.
Kane ka dei namar ba kan don ka jingpyntrei ïa ka bynta jong ka surok Shillong-Dawki. Yn shah tang ïa ki kali ba donkam kyrkieh bad ïa ki kali ba la ïoh bor ban ïaid ha ka por ba khang ïa ka surok.
Ka kompeni ba pyntrei ïa ka surok kan pynbiang ki lad jingïada kynthup ki ‘Signage’ bad ki jingker ba donkam ha bynta jong ka surok.
“Ngi kyrpad ïa baroh ki nongleit nongwan ban ïatreilang bad ki bor pynïaid kali,” la ong ka jingpynbna.
