Shillong, Naiwieng 30
Ha kine ki sngi bad taïew la ïoh ban sakhi ba da ki phew phew tylli ki kali kit skum ki la wan kiew sha ki bynta bapher bapher jong ka nongbah Shillong ban wan pynhap skum.
La ïohi ba kine ki kali kit skum kiba dei da ka Bolero Pick-up, ki la kit skum ha ki por mynmiet bad kiba bun kiba la ïaid lyngba ka surok Mawlai by-pass bad mih sha Mawroh. Ka jingkit ïa u skum ruh ka la long ba la shu kit pathar bad khlem jingtap tarpar satia.
Ka jingkit skum pathar jong kine ki kali, ym tang ba ka wanrah ïa ka jingpynjaboh ïa ki surok ba ki ïaid na ka jinghap jong ki skum ha lynter ka surok, hynrei ka buh ruh ïa ka jingma ïa kiwei pat ki kali bad arshaka kiba ïaid ba ïeng, namar la ïohi ba ka la bam jaka shibun ha surok na ka jingkit shaba palat pud ïa u skum, haduh ba kiba wan na ka liang pyrshah kim lait hynrei ban tur sha nala ne ki bynta ba sharud jong ka surok ban lait.
Halor kane ka jingkit palat pud bad jingpynjaboh jong kine ki kali ïa ki surok syngkien, na ka liang jong ka Seng Samla Umshing Mawkynroh (SSUM) hapoh ka jingïalam u President samla Pyndaplang Nongkhlaw bad General Secretary samla Pynbhalang Khyriem, ha ka janmiet jong ka sngi Saitjaiñ ki la bat noh ïa ki kali ha shiteng lynti bad ban bthah ïa ki nongñiah bad nongbud ba kin tap bha noh da ka plastic ne tarpar ïa u skum.
Na ka liang jong kitei ki nongïalam ka Seng Samla ki la ong ba kane ka jingleh ka jong ki, ka dei hadien ba ki la ïoh bun ki jingujor na ki nongshong shnong khamtam na kito kiba don ïing bad buh dukan harud surok.
“Kum ka seng ngi la shim ka sienjam ba ngin nym ailad ïa ki kali kit skum ba kin ïaid khlem tap tarpar baroh sawdong u pud u sam ka shnong namar kala buh jingeh ïa baroh kiba ïaid ba ïeng na ka surok shnong kiba ju ud ju nam na ka por sha ka por ïa ka jingkhlem akor ki nongñiah kali kit skum,” la ong ki nongïalam ka Seng Samla Umshing Mawkynroh.
