Mawkyrwat, Naiwieng 30
Ka National Highway Demand Committee, South West Khasi Hills District hapoh ka jingïalam jong u Bah Kynpham V. Kharlyngdoh kum u Chairman ha ka 29 tarik u Naiwieng ka la pynlong ïa ka jingïalang ha Mawkyrwat bad ha kane ka jingïalang ka Synjuk ka la pynpaw ïa ka jinglyngngoh kaba khraw halor ka jingbym jubab bad sngap mynthi jong u Symbud Myntri Rangbah ba dei peit ïa ka tnat PWD, u Bah Prestone Tynsong watla kane ka kynhun ka la leit buh ‘appointment’ ban ïakynduh ïa u la ar sien ar wat ban ïakren bad ïamir jingmut halor ka jingangnud jong ki paidbah ka district mynta la da ki phew snem ban ïoh ïa ka surokbah National Highway naduh na Lad Mawreng – Mawkyrwat – Ranikor.
Haba kren sha ki lad pathai khubor hadien ka jingïalang ha kane ka sngi ha Mawkyrwat, u Bah Kynpham u la ïathuh ba ka kynhun la arsien arwat ka la leit buh ‘appointment’ ban rah ïa kane ka mat ha u Symbud Myntri Rangbah, hynrei kim shym la ïoh lad satia ban ïakynduh na ka daw ba u Symbud Myntri Rangbah um shym la ai jubab watla ki la kyrpad ruh wat ïa u MLA ka Mawkyrwat, u Bah Renikton L Tongkhar bad u MLA ka Ranikor u Bah Pius Marwein ban ïarap lem bad kumjuh ki la leit ïakynduh ruh wat ïa u Personal Assistant jong u, hynrei kam shym la seisoh satia.
Kumta, kane ka National Highway Demand Committee ha ka sngi Saitjaiñ ka la shim ïa ka rai ban leit buh ‘appointment’ biang sa shisien, bad lada u Symbud Myntri Rangbah um patiaw ne um kwah halor ka jingkyrpad ban ïakynduh, na ka liang ka kynhun kam banse ban shim da kawei pat ka sienjam ban ïoh pynsngew ïa kane ka jingangnud ki paidbah ka District.
