Shillong, Naiwieng 30
Ka National People’s Party (NPP) ka la kyntu ïa ka Sorkar India ban pyrkhat biang halor ka jingkyntait ban ai ‘Visa’ ïa u Rev. Franklin Graham, u Evangelist Khristan uba pawnam ha ka pyrthei, uba la shah khot sngewbha ban wan sha Nagaland.
Ha ka shithi sha u Myntri tnad kam bar-ri, u National Working President ka NPP, u James P. K. Sangma u la pynpaw ïa ka jingbynñiaw halor ka jingshah kyntait ‘Visa’, da kaba ong ba ka la wanrah ïa ka jingsngewsih hapdeng ki nongïalam Balang bad ki kynhun seng ha ka imlang-sahlang.
“Ka jingthmu ban wan jngoh jong u Rev. Franklin Graham la ïohi ym tang kum ka jingïakynduh kaba man ka por, hynrei kum ka khyllipmat jong ka jingpynthymmai bad jingïatylli ha ka jinglong mynsiem na ka bynta ki jaidbynriew Naga bad na ka bynta ki Khristan ha kylleng ka Thaiñ Shatei Lam Mihngi,” la thoh u James.
U James u la ban jur ba katei ka jingïalang ka lah ban ïalam sha ka jingsuk, ka jingïabeit, bad ka jingïatylli ka imlang-sahlang hapoh ka thaiñ, ha kaba ki ‘riewngeit Khristan ki don ïa ka jingbun paid.
“Ka jingsngewthuh ba la khanglad ïa ka jingïalang niam kaba suk ba saiñ namar ki jingeh ha ka liang ka ‘Visa’ ka buh jingma naba ka lah ban wanrah ïa ka jingïasngewthuh bakla bad ka jinglong la ka jong,” u la bynrap.
Haba burom ïa ka mon jong ka Sorkar ban pynbeit ïa ka jingrung jong ki bar-ri, u James u la kyrpad ban khmih bniah ïa katei ka rai, katkum ki aiñ bad ki kyndon kiba treikam.
“Kum kane ka jingleh kan phah ïa ka khubor kaba khlaiñ jong ka jingkular ka India haba phai sha ka jinglaitluid ha ka jingmane niam bad ka jingkynthup lang ïa baroh, bad kan pynsngewskhem shi kat dei ïa ki jaidbynriew Khristan jong ka Nagaland bad ka Thaiñ Shatei Lam Mihngi kaba ïar,” u la ong.
